SYUDAD SANG ROXAS, Capiz (PIA) — Ginpirmahan nanday Dr. Neil Melencion nga regional manager sang Philippine Coconut Authority 6 kag Dr. Efren Linan nga presidente sang Capiz State University ang Memorandum of Agreement para sa kolaborasyon agud nga magamit ang Coconut Germplasm Collection sa Coconut Breeding Trial Unit sa CapSU Burias Campus sa banwa sang Mambusao.
Ang inisyatibo, nga ginapundohan sang DOST PCARRD sa idalum sang Coconut Farmers and Industry Development Plan (CFIDP), ang nagatuyo nga labi nga maduso ang hybridization sa niyog agud nga makabenepisyo sa mga mangunguma sang niyog sa rehiyon.
Ang kolaborasyon ang magapapatigayon sang rehabilitasyon sa CBTU kag magagamit sang mga koleksyon sang nagkalainlain nga variety sang niyog para sa research kag hybridization agud nga labi nga matagaan katumanan ang pagpananom sang mga variety sang niyog nga may mataas nga produksyon kag mabaylohan ang mga indi produktibo kag apektado sang peste nga mga puno sang niyog.
Nahibaluan nga ang ginatanom nga hybrid nga semilya sang niyog ang ginakuha pa sa iban nga rehiyon nga nagakinahanglan sang labi nga ti-on kag gasto sa transportasyon.
Ginpahayag ni Andy Laurilla nga hepe sang PCA Capiz nga ang nakasaad sa MOA nga ang CapSU ang magapagwa sang kaugalingon nga bersyon sang hybrid coconut kag magatukod sang mga model farm agud nga ma-obserbahan ang adaptability kag produksyon sang tagsa ka hybrid coconut sa lokal nga kondisyon sang klima kag panahon.
Ang duha ka distrito sa probinsya ang pagatukuran sang tag-isa ka model farm nga maga-obserba pa gid sang intercropping sa kalubihan. (AGP/AAL/PIA Capiz)
