SYUDAD SANG ILOILO (PIA) — Liwat nga ginbuksan ang hydration facility sang syudad sang Iloilo para sa mga pasyente sang dengue nga may nagakaigo nga mga referral protocol.
Napahamtang ang pasilidad sa ikaduha nga panalgan sang La Paz Maternity and Reproductive Health Center.
Suno kay Dr. Annabelle Tang, hepe sang City Health Office (CHO), may yara sang 30 nga hospitals beds nga maka-akomodar sa mga pasyente sang dengue nga nagakinahanglan sang hydration kag dalayon nga pagbantay.
Ginpat-ud ni Tang nga ang pasilidad indi magbaton sang konsultasyon ukon walk-in, kundi referral cases lamang tungod sa padayon nga presensiya sang COVID-19.
Dugang pa, ang mga pasyente kinahanglan nga ma-refer sang city district health centers ukon mga pribado nga mga health facilities nga may resulta sang dengue kag COVID-19 tests.
Madumduman nga una na nga ginbuksan ang pasilidad sang 2019 tungod sa dengue outbreak, antes ang pandemya, kun sa diin ang mga pasyente mahimo nga maka walk-in para sa pagpabulong nga wala sang virus-related concerns.
“The reason why we will not be accepting COVID-positive patients is because if ever may co-infection ang pasyente, they will tend to progress sa indi amo later on. Our facility is a mere hydration unit, this is not a hospital, we are not equipped to address kon may COVID kag mag-progress ang iya COVID basi maglala,” pahayag ni Tang.
Sa pihak nga bahin, ang kutob sa mga pasyente nga ginbuligan sang district health centers nga na-test nga positibo sa dengue kag COVID ang iga-refer para sa pagsulod sa ospital.
Ang tanan nga district health centers sa syudad ang may magakaigo nga dengue fast lanes agud mahatagan prayoridad, madasig nga konsultasyon kag pag-atipan ang nagabatyag nga mga indibidwal. Nagatanyag man ang mga sentro sang libre nga dengue tests.
May yara man sang air-conditioned tent nga napahamtang malapit sa Uswag Molecular Laboratory sa distrito sang Molo para sa mga pasyente nga nagakinahanglan sang hydration care samtang nagahulat sang resulta sang RT-PCR test.
Ang mga indibidwal nga nagnegatibo sa dengue apang positibo sa COVID-19 ang iga-rekomenda sang home quarantine kon manageable ang ila kondisyon. Kon kinahanglan nga ipa-ospital, sila ang iga-refer man sa ospital. Ang mga pasyente lang nga nagpositibo sa dengue kag may mild nga simtoma ang pwede makasulod sa hydration unit.
Suno sa impormasyon sang CHO, naglab-ot na sa 775 ang mga kaso sang dengue sa syudad nga may tatlo ka patay humalin sang Enero tubtub Agosto 17. Ang ini nga numero ang 43.3 percent nga mataas ikumpara sang nagligad nga tuig, sa kapareho nga period. Ang mga kabataan halin isa tubtub 10 ka tuig ang masami nga maapektuhan sang dengue.
Sa bahin ni, Dr. Roland Jay Fortuna, CHO assistant department head, ang numero sang kaso sang dengue nga narehistro sang Week 31 ang naglab-ot sa alert kag epidemic threshold nga may 159 ka kaso kag ini ang nagpadayon taas kag naglambot sa epidemic threshold sang Week 32 nga may 155 ka kaso. Apang, ang ini nga mga kaso sang dengue ang nagnubo sing daku sa 40 sang Week 33.
“Ang trending medyo panaog na sya. Based man sa three-year history sang dengue sa syudad sang Iloilo, after the Week 34, amat amat na panaog ang aton cases. We will closely monitor the cases and gina-hope naton nga indi na sya mag-sige saka,” sambit ni Fortuna.
Padayon man ang kampanya sang CHO tuhoy sa importansiya sang 4S nga estratehiya sa kumonidad nga ginlakipan sang Search and destroy breeding places, Self-Protection, Seek early consultation, kag Support spraying to prevent impending outbreak against dengue. (AAL/LMLE/PIA Iloilo *with reports from Iloilo City Gov’t)
