SAN JOSE, Antique (PIA) — Ang “I-Registro” ginapatuman sa kwalipikado nga benepisyaryo kang Pantawid Pamilyang Pilipino Program ukon 4Ps para sanda kag ang anda bata malista sa anang una nga 1000 ka adlaw ukon “first 1000 days” nga pagkabuhi sa idalum kang programa nga F1KD.
Suno kay DSWD-4Ps Provincial Link Jeffrey Gabucay, ang F1KD ginapatuman sa pagkonsulta sa mga nanay nga nagabusong kag nagapasuso, lakip na ang mga kabataan nga naga-edad kang binulan pa lamang hasta sa darwa ka tuig.
Ana ginapadumdum sa mga benepisyaryo kang F1KD grant nga dya sangka top-up grant ukon dugang nga benepisyo nga gindesenyo para mapasiguro ang ikaayong lawas kag nutrisyon kang kabataan sa andang una nga 1000 nga adlaw kang pagkabuhi.
Ang dya nga programa ginpatuman run sa banwa kang Barbaza, Bugasong, Culasi, Patnongon, Sebaste, Tibiao, kag Valderrama.
Ang DSWD-Field Office VI National Household Targeting Section (NHTS) nagbulig man sa pagpatuman kadyang programa sa nasambit nga kabanwahanan.
Suno kay Maybel Esparagoza, information officer kang 4Ps Antique, ang I-Registro sangka online platform nga gindesenyo para mapasimple kag mapadali ang proseso kang pagparehistro para sa mga benepisyaryo nga kwalipikado nga makaagum kang F1KD grant.
Ang DSWD-4Ps Antique nagreport nga sanda nakarehistro run kang 1,296 ka mga bata nga may edad 0-2 ka tuig kag 203 ka mga nagabusong nga mga nanay. (AGP/PSM/PIA Antique kaimaw ang mga balita halin kay JYD/UA Intern)
