SYUDAD SANG ILOILO (PIA) — Ginpasalig sang Iloilo City Police Office (ICPO) nga may ginpatuman nga mga komprehensibo nga security measures agud mapat-ud ang kalinong, katawhay kag kaluwasan sang pareho nga kandidato kag publiko sa pagsugod sang lokal nga kampanya para sa 2025 mid-term election sang Biyernes, Marso 28.
Ang campaign period nga magalawig humalin Marso 28 tubtub Mayo 10, 2025 nagasakop sang mga kandidato nga magapapili para sa posisyon kasubong sang miyembro sang House of Representatives, gobernador, mayors, kag konsehal.
Suno sa ICPO mga serye sang pagsinapol, coordination effort kag kolaborasyon ang ginpatigayon agud mapat-ud nga ang tanan nga nagakaigo nga mando kag instruksyon ang napahamtang na para magarantiya sang mga unit commander ang tayuyuon kag sekyur nga pagpatigayon sang mga aktibidad sa kampanya.
Bilang kabahin sang ila strategic deployment, ang ICPO magapahamtang sang dugang nga mga personnel sa mga nagapanguna nga lugar kalakip ang venue sang kampanya, pampubliko nga espasyo kag iban pa nga mga high-risk nga lokasyon agud matapna ang mga pamahog kag makaresponder gilayon sa mga butang nga may kahilabtanan sa seguridad.
Hugot nga nagakoordinar ang ICPO sa mga lokal nga panguluhan, sa Commission on Elections (COMELEC) kag iban pa nga tagsakdag agud mapabilin ang luwas kag matawhay nga palibot sa sa bug-os nga election period.
Ginpabaskog man ang mga intelligence operation agud makilala kag mapahagan-hagan ang mga potensyal nga pamahog sa seguridad sa pagpat-ud sang sekyur nga palibot sa tanan nga mga aktibidad sa kampanya.
Liwat nga ginpamat-ud ni Direktor PCol. Kim Legada ang dedikasyon sang ICPO sa political neutrality kag hugot nga pagpatuman sang mga laye sa eleksyon sa iya pahayag “We are fully committed to safeguarding the integrity of the election process.”
“To the candidates, I urge you to obey laws and orders, promote peace, and collaborate with the authorities. To our community members, we ask for your active participation, vigilance, and respect. Together, let us work towards a safe, fair, and successful election period,” dugang ni Legada.
Sa tion sa campaign period sang mga nasyunal nga kandidato nga nagsugod sang Pebrero 11 sini nga tuig, ang ICPO wala sang may nabalhag nga mayor nga insidente may kaangtanan sa eleksyon nga nagapakita sang iya mabakod nga commitment sa kaluwasan sang publiko kag kalinong.
Ginapanawagan man sini ang publiko nga magkooperar kag magpasakop sang responsable sa palaabuton nga eleksyon.
Mahimo magbisita ang publiko sa pinakamalapit nga istasyon sang pulis ukon mag-kontak sa mga masunod nga ICPO hotlines 0908-377-0194 ukon 335-0299 para sa bulig ukon concerns. (AAL/LAF/PIA6-Iloilo/ICPO)
