SYUDAD SANG ILOILO (PIA) – Ginkilala sang lokal nga panguluhan sang Igbaras, Iloilo ang dako nga papel sang pagpalapnag sang husto nga mga impormasyon, ilabi na sa pagpatigayon sang polisiya kag mga programa sang gobyerno sa lokal nga lebel.
“Tandaan gid naton nga ang husto nga impormasyon importante kag kinahanglan gid naton sa aton local governance,” siling ni Igbaras Mayor Vicente Escorpion Jr. sa iya mensahe sa ginhiwat nga Orientation on Barangay Information Officers (BIO) sa Igbaras Municipal Hall sang Marso 26, 2025.
Ang programa nga ginpangunahan sang Philippine Information Agency (PIA) – Iloilo Information Center kaupod ang Department of the Interior and Local Government (DILG)-Iloilo kag Igbaras LGU ang gintambungan sang mga gindesignar nga BIOs sa tagsa ka barangay sang banwa.
Ginpahayag man ni Escorpion nga daku ang mabulig sang husto nga komunikasyon sa barangay nga lebel sa pagtaytay sang mga mapinuslanon nga mga impormasyon sa komunidad kag malikawan ang paglapta sang mga peke nga balita.
“Everytime gani nga maghambal nga information, ang first thing nga sa current situation nga akon nadumduman, ang proliferation kang fake news kag false narrative. Kag sa akon lang, this is very alarmin, especially sa field of governance kay basi bala kun gullible kita kag we make it a point nga sa policy nga ginahimo naton, magamit ang false information,” dugang pa sang alkalde.
Ginpakigbahin naman ni PIA Iloilo information officer II Liez’l Marie L. Ejeda ang papel sang BIOs kag ang importansya sang pagtukod sang isa ka network sang mga community-based information officers sa pagpasanyog sang mga proyekto, programa, kag serbisyo sang gobyerno paagi sa nagkalainlain nga mga plataporma sang media.
Ginpahibalo man ni DILG-Iloilo LGOO II Paula Castillo ang mga barangay officials nahanungod sa DILG Memorandum Circular No. 2017-165, nga nagabalay sang framework sa pagdesignar sang mga BIO; samtang naghatag naman sang ihibalo si PIA Iloilo information officer I John Noel Herrera sa mga BIOs kun paano mabal-an ang mga peke nga impormasyon, ilabi na sa social media.
Nagpasalamat naman si PIA-Iloilo Government Information Center Coordinatior (GICC) Lilibeth A. French sa Igbaras LGU kag sa mga barangay official sa ila suporta sa programa nga nagasiguro nga ang mga proyekto kag serbisyo sang gobyerno makalab-ot sa komunidad, kag ang mga kabalaka sang publiko ang makalab-ot man sa gobyerno nasyonal para sa kinahanglanon nga aksyon.
Ang programa ang ginlakipam man sang pagpili kag pag-induct sang mga opisyales sang BIO Network sang Igbaras, kun sa diin si Escorpion ang nagpanguna sang ila oath-taking, nga ginsundan sang pledge of commitment nga ginpangunahan ni PIA Iloilo GICC Lilibeth A. French. (AAL/JNH/PIA Iloilo)
