TAGBILARAN CITY, Bohol (PIA) — Gipahigayon sa lungsod sa San Miguel ang ika-8 nga Bohol Dairy Festival niadtong Hulyo 17.
May temang “Malungtarong Panggatasan, Malahutayong Panginabuhian,” ang kalihokan nagsaulog sa milestones sa Bohol Dairy Development Program, nga gihatagan og P9.2 milyones alang sa Buffalo Dairy Processing and Marketing.
Ang Office of the Provincial Veterinarian (OPV) pinangulohan ni Dr. Stella Marie Lapiz maoy nangulo sa lineup sa mga aktibidad nga gisugdan sa Festival Carabao Parade contest nga gisalmotan sa mga grupo, kooperatiba, ug mga representante sa OPV.
Si San Miguel Mayor Ian Gil Mendez maoy mihatag sa welcome remarks atol sa program proper nga gipahigayon sa San Miguel Municipal Gymnasium.
Si National Dairy Authority (NDA) Officer in charge Atty. Gavino Alfredo Benitez, kanhi mayor sa San Miguel, ug Executive Assistant Nunila Pinat nga representante ni Acting Governor Dionisio Victor Balite ug Congresswoman Vanessa Aumentado nipadangat usab sa mga mensahe sa suporta.
Gipamatud-an pag-usab ni Pinat ang pasalig sa Panggamhanan sa Probinsiya nga suportahan ang industriya sa dairy sa probinsya ug ang tinguha niini nga mahimong usa ka dairy capital, nga nakaangkla sa estratehikong pagdumala sa roadmap ni Gobernador Erico Aristotle Aumentado sa people empowerment ug pagpalambo sa negosyo ngadto sa lokal nga pagtubo sa ekonomiya.
Mitambong usab atol sa maong okasyon sila si Executive Director Caro Salces, Philippine Carabao Center (PCC) Deputy ug Eng. Cirilo Namoc sa Department of Agriculture Region 7.
Sila si Pinat, Mendez ug Roger Damalerio sa Bohol Dairy Cooperative (BODACO) milagda og Memorandum of Agreement (MOA) alang sa Pagtukod sa Community-based Feed Mill sa Provincial Government sa Bohol ngadto sa Local Government Unit sa San Miguel ug BODACO.
Usa ka Certificate of Entrustment usab ang gitunol sa LGU Candijay nga gipangulohan ni Mayor Thamar Olaivar nga mokabat sa P5,422,675 alang sa pagpalapad sa ALAB Karbawan Project.
Samtang, ang mga kagamitan ug suplay sa dairy gi-turnover usab sa NDA ug OPV.
Ang Katarungan Small Coconut Farmers gihatagan og tulo ka unit sa forage chopper, duha ka unit sa grass cutter, ug usa ka hand tractor, 65 ka mineral blocks, 75 ka sudlanan sa mineral molasses, 14 ka balde sa gatas, ug 350 ka silage bag ang gipagawas usab sa 12 ka People’s Organization gikan sa Alicia, Candijay, Dagohoy, Mabini, San Miguel ug Ubay.
Dugang pa, ang Bohol Dairy Cooperative, Farmers Gabi Association (FAGA), San Jose Buffalo Dairy Producer Association, Katipunan Farmers and Escaya Credit Cooperative, Village Dairy Farmers Association, Bugang Dairy Breeders Association, Untaga Multi-Purpose Cooperative, Bongbong Dairy Association, Libertad Tubigon Farmers Association, ug Sagbayan Farmers Association gihatagan og ekipo gikan sa kagamhanang probinsiyal.
Ang 20 ka ATI-NDA CFID graduates nakadawat usab sa ilang certificate of appreciation and completion on Basic Dairy Husbandry for Cattle uban sa awarding sa mga himanug ekipo atol sa kalihokan.
Ang mga mananaog sa kompetisyon gihatagan usab sa ilang mga premyo nga tag P5,000 matag usa.
Ang pinakataas nga produksyon sa gatas gihatag ngadto kang Grace Boyles.
Ang poster making contest gidaog sa mga tinun-an sa Bugang National High School samtang ang best dressed carabao 1st prize winner mao si Marge Añuba.
Ang Dairy Festival gitapos sa mga dula nga gipasiugdahan sa BMEG premium ug UNAHCO.
Usa ka ceremonial Festival Milk Toast nga gisalmotan sa 50 ka mga bata ang gipahigayon uban ni PCC-Ubay Director Dinah Loculan, ug uban pang dinapit nga mga bisita. (ECB/PIA7-Bohol)
