TAGBILARAN CITY, Bohol, November 14 (PIA) — Gipahigayon karon ang ikaduhang Bohol Organic Agriculture Festival nga gibuksan niadtong Nobyembre 13, diin gisalmotan kini sa 17 ka organic agriculture farming practitioners gikan sa humay, utanon, prutas, fruit tree seedlings, cacao, herbs, mushroom, ug uban pa.
Ang presidente sa Kapunungan sa Bol-anong Organikong Mag-uuma (KaBoOM) nga si Marilou Escalona ang miabi-abi sa mga exhibitors ug organic agriculture stakeholders atol sa pagbukas niadtong Lunes sa Bohol Showcase Center sa syudad sa Tagbilaran.
“Our goal is for all Boholanos to plant their own vegetables and to produce their own food (Ang atong tumong mao ang tanang Boholanos nga mananom og kaugalingong mga utanon ug makaprodyus sa ilang kaugalingong pagkaon),” matod pa ni Escalona sa kalihukan sa organic agriculture nga mitubo ngadto sa 200 ka miyembro sukad sa pagsugod niini niadtong tuig 2014.
Atol sa maong okasyon, gitugyan sa Agricultural Training Institute (ATI) pinaagi ni Regional Director Grace Arado ang P1 milyon nga kantidad ngadto sa kagamhanang probinsyal pinaagi ni Oscar Valles, representante ni Gobernador Erico Aristotle Aumentado, alang sa programang Agriculture and Fisheries Extension Systems (PAFES) nga gipangulohan sa probinsiya.
Gipadayag ni Valles ang garbo ni Aumentado sa mga produkto sa organikong umahan nga gipakita atol sa kapistahan uban sa liderato sa naulahi nga nag-una sa pagpalambo sa agrikultura aron makab-ot ang climate smart agriculture nga gipasiugdahan sa estratehikong pagdumala sa roadmap.
Una nang gilagdaan ni Aumentado ang Executive Order No. 30 nga nagmugna sa Technical Working Group aron mapadali ang suporta sa organikong agrikultura.
Gawas sa organic product showcase, ang tulo ka adlaw nga festival naglakip usab sa Regional Organic Agri Quiz Bee ingon man ang mga pagbansay-bansay sa vermi production, organic soil amendments, stingless bee production, urban gardening, organic cacao production ug organic feed formulation.
Ang buwan sa Nobyembre gideklarar nga Organic Agricultural Month pinaagi sa Presidential Proclamation No. 1030 nga gipagawas niadtong 2015.
Sa ika-2 nga selebrasyon niini sa probinsiya, ang tema karong tuiga mao ang “Panginabuhing Organiko, Kaugmaon Segurado”. (ecb/PIA7-Bohol)
