SYUDAD SANG ILOILO (PIA) — Magahiwat ang syudad sang Iloilo sang Arts Festival sa palaabuton nga Oktubre nga nasandig sa tema nga “Creative Collaborations in the Community.”
Suno kay Arch. Wilfredo Sy, Jr. sang Iloilo City Local Culture and Arts Council (ICLCAC), tinutuyo sang ini nga kahiwatan nga ipakita ang talento kag “artistry and creativity” sang mga Ilonggo sa patag sang musika, art market and poetry reading, culinary and literary arts, architecture and cinema, dramatic arts, digital and industrial design, mural painting, kag, dance and fashion.
Nalakip sa mga aktibidad ang pagtipon sang mga artists sa syudad para sa exhibit kag workshop, paghiwat sang cooking demo, film showing, paindis-indis sa pagsulat sang kanta, binalaybay kag iban pa.
Pinaagi man sa theater play nga igapatigayon sa mga kabarangayan ukon plaza, igapasundayag ang kinaiya kag kultura sang mga Ilonggo nga magpaalinton sang makahulugan nga mga mensahe sa mga tumalan-aw.
Sa bahin ni Iloilo City Mayor Jerry Treñas, padayon nga ginasuportaran sang lokal nga panguluhan ang Arts Festival pinaagi sa pagporma sang Technical Working Group (TWG) kag pagskedyul sang strategic planning session agud magiyahan ang mga ginapatigayon nga cultural programs.
Madumduman nga gintukod ni Treñas ang ICLCAC sang Abril 2022 kaupod ang Committee on Local Heritage Conservation Council agud pangunahan ang mga programa kag proyekto sa bahin sang arts kag culture. (AAL/LMLE/PIA Iloilo)
