SYUDAD SANG ILOILO (PIA) – Opisyal nga ginlunsar sang Iloilo City government ang “Iloilo Blooms: Bulak sa Pag-Uswag”, isa ka inisyatibo upod ang pribado nga sektor, NGOs, kag civic society organizations nga nagalaum nga mas mapatahum pa ang syudad.
Isa ka Executive Order (EO) ang ginpirmahan ni Iloilo City Mayor Jerry P. Treñas, kaupod ang asawa sini nga si Rosalie Trenas, kag representante sang Garden Club of Iloilo City, Zonta Club of Iloilo City Inc., JCI Ilang-Ilang, MerryMart Consumers Corporation, Jesus is Love Church kag Kingdom Advancement Movement para sa opisyal nga paglunsar sang nasambit nga proyekto.
Ang proyekto nga ginapangunahan ni Treñas ang may tinutuyo nga magpananom sang sang 100,000 ka Bougainvillea, Yellow Bells, Fukien Tea Tree, Gumamela, kag Golden Ficus sa center island sa Diversion Road kag iban pa nga pampubliko nga lugar sa syudad.
Ginaplano man nga magtanom sang kalachuchi sa Arevalo district; Palawan cherry blossom sa City Proper; golden trumpet tree sa Jaro; yellow bell sa La Paz; botong tree sa La Puz; molave tree sa Mandurriao; kag banaba tree sa distrito sang Molo.
Suno kay Treñas, nalakip ang proyekto sa commitment sang Iloilo City Government nga magpatuman sang mga green projects kag buhion ang mga pampubliko nga lugar pinaagi sa pagpananom.
Ginpahayag naman ni Shirley Sanders, konsultant sang proyekto, nga dako ang mabulig sang “Iloilo Blooms” para sa pagpasanyog sang environmental sustainability kag turismo sa syudad.
“This is about making Iloilo a Blooming Garden City among the cities in the Philippines. Because if you can be a pioneer, maybe the rest of the cities all over the Philippines will replicate it just like Singapore, the Garden City of Southeast Asia. Talagang sobrang ganda ng Singapore,” siling ni Sanders. (AAL/JNH/PIA Iloilo)
