SYUDAD SANG ILOILO (PIA) – Tatlo ka mga kasugtanan ang ginlagdaan sang Iloilo City government kag sang Department of Social Welfare and Development (DSWD)-6 angut sa mga igapatuman nga mga programa sa syudad para sa kaayuhan sang mga Ilonggo.
Sa ginhiwat nga signing ceremony sang Pebrero 27, 2025, nagpasalamat si Mayor Jerry P. Treñas sa DSWD-6 bangud dako ang mabulig sang mga programa sa pangabuhi sang publiko.
“Gapasalamat ko sa tanan nga programa sang DSWD. This means that we have done something to improve the lives of our fellow Ilonggos. Ang maayo nga madala naton diri sa kalibutan amo ang aton continuous effort to make the life of our people better every day,” siling pa ni Treñas.
Ang mga kasugtanan nga ginlagdaan sang duha ka partido amu ang Memorandum of Agreement (MOA) para sa Walang Gutom 2027: Food Stamp Program, Memorandum of Understanding (MOU) para sa Social Pension for Indigent Senior Citizens Program, kag Data Sharing and Non-Disclosure Agreement.
Ang “Walang Gutom” nga programa nagatuyo nga mabuhinan ang insidente sang ‘involuntary hunger’ nga gina-eksperyensyahan sang mga pamilya nga may manubo nga kita. Sa idalom sang MOA, ang lokal nga panguluhan ang gintugyanan sa pag-endorso sang programa sa mga kabarangayan, paghatag sang logistical support, kag paghatag sang endorsement kag koordinasyon sa mga natungdan nga talatapan sang syudad.
Sa karon, ara na sa 419 ka mga pumuluyo sang syudad ang nakabenepisyo sang P3,000 kada bulan sa sulod sang tatlo ka tuig nga Electronic Benefit Transfer Cards, nga sarang magamit sa pagbakal sang pili nga mga balaklon nga pagkaon sa kwalipikado nga partner stores kag mga negosyante.
Samtang, ang Data Sharing and Non-Disclosure Agreement ang makabulig para sa maayo nga pag-usisa kag pagbantay sang mga programa nga ginapatuman sa syudad. Partikular nga ginasiguro sini nga ang tanan nga mga benepisyaryo sang 4Ps nga narehistro sa database sang DSWD-6 ang nagasanto sa numero sang mga benepisyaryo nga nagabaton sang serbisyo.
Upod naman ni Treñas nga naglagda sang mga kasugtanan sanday DSWD-6 director Arwin Razo, Asst. Regional Director Joselito Estember, City Social Welfare and Development Officer Teresa Gelogo, kag DSWD-6 Division Chiefs Katherine Joy Lamprea kag Asuncion Santiago.
“We appreciate the support and the efforts para tuloy-tuloy na magkatuwang si DSWD at si local government unit. We look forward to sustaining and nurturing this reinforcing partnership towards the betterment of the constituents,” pahayag ni Razo. (AAL/JNH/PIA Iloilo/with reports from Iloilo City PIO)
