SYUDAD SANG ILOILO (PIA) – Hugot nga ginapamatukan sang Iloilo City government ang posible operasyon sang Philippine Offshore Gaming Operators (POGO) sa syudad.
Sang Hulyo 10, isa ka executive order (E.O.) ang ginpagwa ni Mayor Jerry P. Treñas nga nagamando sang polisa sang syudad natuhoy sa iligal nga POGOs.
Sa idalom sang E.O. No. 94, hugot nga ginadumilian sang lokal nga panguluhan ang iligal nga aktibidad kag operasyon sang POGOs sa syudad agud nga malikawan ang iban pa nga mga ilegal nga aktibidad, kaangay sang human trafficking kag illegal gambling nga naangot sa mga POGOs.
Ang E.O. No. 94 ang nagadeklara man sa mga pulis, City Treasurer’s Office, Local Economic Development and Investment Promotion Office (LEDIP), kag City Local Economic Enterprise Office (LEEO) nga gamiton ang ila mga katungdanan sa idalom sang kasuguan kag imbestigaran ang bisan ano nga ginasuspetsahan nga mga establisemento sang POGO sa syudad.
“This investigation shall include establishment illegally of POGOs without the required regulatory requirements, and establishments operating illegally as POGOs but registered as operating under a different line of business,” suno pa sa E.O. No. 94.
Ginhatagan man pagtamod ni Treñas ang hugot nga mga tikang nga nagasanto sa mando sang syudad sa pagpasanyog sang pangkabilugan nga kaayuhan sang mga pumuluyo, pagpauswag sang moralidad sang publiko, kag pagmentinar sang kalinong.
Ginpagwa ni Treñas ang E.O. kasunod sang padayon nga imbestigasyon sang Iloilo City Council angot sa pagdamo sang mga undocumented immigrants, partikular ang ginreport nga unregulated activities sang posible Chinese-led POGOs sa syudad. (AAL/JNH/PIA Iloilo)
