SYUDAD SANG ILOILO (PIA) — Natalana nga maga-host sang nagkalain-lain kag dalagko nga mga events ang syudad sang Iloilo sa ini nga tuig, suno kay Lea Victoria Lara, direktor sang Iloilo City MICE (Meetings Incentives Conferencing Exhibitions) Office.
Nalakip sa mga aktibidad ang Arts Festival nga pagahiwaton sa Oktubre kag iban pa nga mga dalagko nga events nga wala anay ginhingadlan sa bulan naman sang Hulyo.
Angot sini, ginpahayag ni Lara nga nangin madinalag-on ang MICE sa kampanya sini sa pag-ganyat sang mga bisita sa idalom sang Visit Iloilo campaign.
“We’re happy that the MICE alliance is very successful in the campaign to attract visitors under the Visit Iloilo campaign. We want to reinforce that with experience tourism, so we’re coming up with a lot of turism circuits maybe centering arund innovation and creativity,” pahayag ni Lara nga isa sa mga panel discussants sa ginhiwat nga Iloilo CleanTech Conference.
Ang ini nga aktibidad nagtipon sang mga industry leaders, hoteliers, restaurateurs, healthcare kag laundry professionals sa tinutuyo nga madiskusyunan ang best practices sa bahin sang laundry industry nga ginakabig bilang isa sa nagatubo nga mga sektor sang ekonomiya sa pungsod tungod sa kontribusyon sini sa turismo.
Ginpakigbahin man ni Lara nga luyag sang city government nga ma-integrate ang “green best practices” sa mga operations partikular na ang industriya sang mga hotel.
“This is something that Iloilo can be known for. We have a lot of environment protection initiatives, heritage conservation initiatives,” sambit ni Lara.
Dugang pa, ginpasalamatan ni Lara ang mga partners sang city government nga nagabulig kag nagasuporta sa hilikuton agud mapadayon ang pag-uswag sang syudad. (AAL/LMLE/PIA Iloilo)
