SYUDAD SANG ILOILO (PIA) – Liwat nga magabida ang mga madinuagon nga paraw sa baybayon sang Iloilo sa paghiwat sang ika-52 nga Paraw Regatta Festival subong nga tuig nga nagahatag pagkilala man sa industriya sang maritime sa rehiyon.
Ginpahayag ni John Lex Bayombong, chairman sang Paraw Regatta Festival, nga 70 porsyento na sila nga handa para sa selebrasyon nga magaumpisa sa Pebrero 23, 2025.
Dugang pa sini nga nakaistorya na sila sa nagkalai-lain nga mga organisasyon, lakip na ang Philippine Coast Guard, agud masiguro ang matawhay kag luwas nga pagpatigayon sang festival.
Ang selebrasyon subong nga tuig, nga magatapos sa Marso 2, ang naangkla sa tema nga “Sailing Blue Waters on this Green Earth,” nga nagatuyo man nga mas mapabaskog ang kampanya natuhoy sa pagprotekta sang palibot samtang ginasaulog man ang manggaranon nga maragtas sang kadagatan.
Sa pihak nga bahin, ginpahayag ni Dr. Roberto Samosa, chairman sang Paraw Sailing Event nga ang festival ang maga-highlight sang Paraw Main Race nga magasugod sa shoreline sang distrito sang Arevalo pakadto sa Guimaras kag pabalik sa Arevalo.
Ginpahayag ni Samosa nga wala pa makumpirmar ang kabug-usan nga numero sang mga magapakigbahin sa sailing events, kung sa diin laban diri ang magahalin sa Boracay Island kag malapit nga mga coastal towns sa Iloilo.
Gin-engganyo man niya ang mga operator sang Paraw nga tudluan ang mga pamatan-on kon paano maglayag sang paraw agud nga magapadayon sa gihapon ang tradisyon sa pihak sang mga pagpanghangkat sang modernisasyon.
Samtang, lakip naman sa mga kahiwatan para sa Paraw Regatta Festival subong nga tuig amo ang Sinamba sa Regatta, Paraw Lechon Contest, Pinta Layag, Pinta Tawo, Slalom Race, food festival, kag iban pa.
May ara sang 10 tubtob 12 ka mga entries para sa Lechon contest, kun sa diin ang mga putahe igatanyag nga libre sa publiko pagkatapos sang judging; samtang may ara na sang anum ka kumpirmado nga grupo nga magapasakop sa Sinamba sa Regatta. (AAL/JNH/PIA Iloilo)
