SYUDAD SANG ILOILO (PIA) – Naghiwat sang public New Year’s countdown celebration ang Iloilo City government sa gab-i sang Disyembre 31, 2024 sa Iloilo Freedom Grandstand, nga naghatag sa mga Ilonggo sang isa ka gab-i nga puno sang kasadya.
Ginpahayag ni Mayor Jerry P. Treñas nga ang kahiwatan naghatag sa tanan sang kahigayunan nga magselebrar sing tingob samtang ginaabi-abi sang siudad ang 2025 nga may paglaum kag kalipay.
“This is an extraordinary celebration of hope, unity, excitement, and pride as multi-awarded Ilonggos, carefully planned to ensure a wholesome and safe experience for all,” siling ni Treñas.
Ang kahiwatan nagpakita sang live performances sang mga talentado nga lokal nga banda halin 10:00 sang gab-i sa Disyembre 31 tubtob 2:00 sang kaagahon sa Enero 1, 2025; samtang ang highlight sang selebrasyon amo ang grand fireworks display sa Atty. Cesar Drilon Bridge.
Ginsiguro man sang lokal nga panguluhan sang syudad ang seguridad sang publiko bangud ara sa lugar ang Iloilo City Police Office, public safety officers, traffic aides, kag mga ambulansya halin sa City Disaster Risk Reduction and Management Office agud masiguro ang hilway nga pagselebrar sang mga Ilonggo.
Ginpahayag naman ni Leny Ledesma, Executive Assistant for Special Projects, nga ginkontrata sang syudad ang Dragon Fireworks nga nag-uyat sang 15 minutos nga fireworks display para sa New Year countdown.
Dugang pa ni Ledesma nga ang selebrasyon nagasanto sa kampanya sang Department of Health (DOH) nga nagaduso sang mga palupok sa komunidad nga mahimo ma-enjoy sang publiko gikan sa luwas nga distansya agud malikawan ang mga emerhensiya.
Gintumod sang Iloilo City Police Office (ICPO) ang Muelle Loney area sa syudad bilang designated fireworks and firecrackers zone, samtang ang Brgy. Buhang sa distrito sang Jaro, distrito sang Arevalo, kag Muelle Loney sa distrito sang City Proper ang ginatumod nga mga lugar nga ginabaligyaan sang mga palupok.
Samtang, ginpahayag naman ni Traffic and Transportation Management Office head Ret. Col. Uldarico Garbanzos nga ginpatuman ang road closures sa gab-i sang selebrasyon.
Ang Cesar Drilon Bridge kag ang bilog nga Muelle Loney Street ginsiraduhan sumugod 10:00 sang gab-i sa Disyembre 31 kag nagpatuman sila sang mga vehicular traffic scheme.
Libre man ang kahiwatan para sa tanan agud mahatagan ang mga Ilonggo sang tiun nga maka-enjoy kag makaselebrar upod sa ila pamilya kag mga pinalangga.
“I look forward to celebrating with you all as we usher in the new year with hope, unity, and excitement,” siling ni Treñas. (AAL/JNH/PIA Iloilo)
