SYUDAD SANG ILOILO (PIA) – Naglagda sang isa ka joint venture agreement (JVA) ang Iloilo City government upod ang EON Realty and Development Corporation (ERDC) para sa konstruksyon kag pagpauswag sang condominium housing projects sa idalum sang Pambansang Pabahay Para sa Pilipino (4PH) Program.
Ang nasambit nga kasugtanan ang ginpirmahan nanday Iloilo City Mayor Jerry Treñas kag ERDC president Franjieh Eon Angelo Tiu sang Marso 25, 2025. Ini ang ginsaksihan nanday Iloilo City Local Housing Office head Peter Jason Millare kag Department of Human Settlement and Urban Development (DHSUD) Western Visayas regional director Eva Maria Marfil.
Ang PHP2.54-billion nga Iloilo City USWAG Condominium Complex Project ang pagatukuron sa halos duha ka ektarya nga lote nga ginapanag-iyahan sang city government sa Barangay San Isidro sa distrito sang Jaro.
Ang multi-level residential condominium nga proyekto nga ginabug-usan sang 1,677 ka mga yunit ang may ara sang 13 ka 10-storey bulding kun sa diin may ara sang 129 ka units ang kada building.
Suno kay Millare, ang proyekto ang para sa mga pamilya nga may manubo nga kita, mga informal settlers, kag mga first-time buyers. Ang mga presyo nga gin-aprubahan sang DHSUD ang gintalana sa PHP1.5 milyones para sa 24-square-meter units kag PHP1.7 milyones para sa 27-square-meter units.
Samtang, gin-engganyo man ni Marfil ang iban pa nga local government units nga mag-apply sang 4PH, ilabi na sa urban areas.
Suno sa iya, ang 4PH amo lamang ang programa sang gobyerno nga may subsidiya gikan sa national government kun sa diin ang mga bumalakal nagabayad lamang sang 1.25 porsyento nga tuigan nga interes.
Ginpahayag naman ni Treñas nga may ara pa sang lote ang city government para sa housing projects kag ginhingyo niya ang mga interesado nga aplikante nga magkoordinar sa local housing office. (AAL/JNH/PIA Iloilo)
