SYUDAD SANG ILOILO (PIA) – Pormal nga gin-inagurahan sang Iloilo provincial government, kaupod ang Korea International Cooperation Agency (KOICA) ang fish port sa banwa sang Concepcion sang Septyembre 24, 2024.
Ang inisyatibo ang parte sang Northern Iloilo Fishery Rehabilitation and Development (NI-FRDP) project, kung sa diin kapin USD7.8 milyones nga grant ang ginhatag sang KOICA para sa nasambit nga proyekto nga nagalaum nga makay-o kag mahatagn sang moderno nga pasilidad ang mga mangingisda sa Concepcion, Iloilo.
Ang bag-o nga pantalan may ara sang mas mataas nga platform, mas maayo nga drainage system, malapad nga parking area, kag mas masanag kag energy-efficient nga mga suga.
“Dako gid in inga bulig sa amon nga mga mangingisda, ilabi na sa may mga ara man dalagko nga fishing vessels nga nabudlayan nga magdungka sa nauna nga daan nga port,” pahayag ni Olivia Pansensoy, presidente sang Tambaliza Small Fishermen’s Association (TASFA) Banban chapter.
Dugang pa niya nga ang ginpaayo nga pantalan ang maagapahagan-hagan sang pagginutok kag mas magapalawig sang oras sang negosyo, kung sa diin mas makabenepisyo ang mga konsumidor kag mga mangingisda.
Suno naman kay Concepcion Mayor Millard Villanueva, ang fish port indi lang isa ka infrastructure development kundi isa ka simbolo sang paglaum para sa tanan kung sa diin magapadayon ang pagbangon kag pagsanyog sang fishing community.
Ang bag-o nga pantalan gindesinyo agud makabato sa palaabuton nga mga kalamidad agud nga mas masuportahan man ang sekto sang pagpangisda sa probinsya.
Samtang, sa iya mensahe, ginhatagan pagtamod ni Governor Arthur Defensor, Jr ang kritikal nga papel sang Visayan Sea sa pagsustenir sang ekonomiya kag turismo.
“The sustainability of this fish port depends on the supply of fish, and the supply of fish depends on the health of the Visayan Sea,” siling ni Defensor nga nagpanguna sa inagurasyon kaupod si KOICA country director Kim Eunsab kag iban pa nga lokal nga opisyales. (AAL/JNH/PIA Iloilo)
