ILOILO CITY (PIA) – Ginduso sang City Council sang Iloilo ang hugot nga health and safety measures sa Iloilo International Airport sa banwa sang Cabatuan kag sa tanan nga seaports sang syudad sa tunga sang pamahog nga dala sang monkeypox (mpox) disease.
Gin-aprubahan sang konseho ang resolusyon sadtong Setyembre 4 nga nagahingyo sa tagdumalahan sang airport kag mga pantalan nga magpatuman sang mga tikang agud malikawan ang paglapta sang nasambit nga balatian nga gindeklarar na sang World Health Organization (WHO) bilang isa ka global health emergency.
“It is important to impose strict health measures at our airports and ports to prevent the spread of mpox in Iloilo City and neighboring areas,” suno sa bahin sang resolusyon.
Ang resolusyon nagduso man sang pagbutang sang mga thermal scanner sa mga airport kag mga pantalan kag pagdugang sang visual surveillance sang mga opisyales.
Ginhatagan punto ni Councilor Alan Zaldivar, nga amu ang nagdihon sang resolusyon, nga samtang ang pagbiyahe kag negosyo paagi sa mga airport kag mga pantalan nagadugang sa pag-uswag sang ekonomiya sang syudad, mahimo man ini maghatag sang risgo sa ikaayong lawas sang publiko kon wala sang strikto nga implementasyon sang mga tikang sa kaluwasan, ilabi na sa nagadamo nga numero sang mga kumpirmado nga kaso sang mpox sa pungsod.
Samtang sa probinsya sang Iloilo, ginpahayag ni Gov. Arthur Defensor Jr. nga nagaplano sila nga magbutang sang quarantine team sa airport.
“We are preparing for the October international flights. We have the guidelines and we are about to execute them, particularly on avoidance of physical contact. As to the border control, we have to wait for the international flights before we execute” pahayag sang gobernador.
Ang datus gikan sa Department of Health (DOH) nagapakita nga may yara sa karon s walo ka aktibo nga kaso sang mpox sa Pilipinas kung sa diin may tatlo ka bag-o nga kumpirmado nga kaso nga nareport sa Metro Manila (2) kag sa Calabarzon region (1). (AAL/JNH/PIA Iloilo)
