SYUDAD SANG ILOILO (PIA) – Nakabaton sang bulig pinansyal gikan sa provincial government ang 43 ka local government units (LGUs) sa Iloilo agud mapasanyog ang ila kapabilidad sa pag-respondi sa problema sa dengue bangud natalupangdan nga nakarekord sang mataas nga kaso sang nasambit nga balatian ang probinsya.
Nag-isyu sang Executive Order No. 184 s.2024 si Gov. Arthur Defensor Jr. nga nagahatag sang P9.1 milyones nga bulig pinansyal sa tanan nga LGUs kag nagpirma sang memorandum of agreement (MOA) upod sa League of Municipalities of the Philippines (LMP) – Iloilo sang Setyembre 4, 2024 para sa pag-release sang nasambit nga dengue aid nga pagagamiton para sa mga tikang sa pagtapna kag pagkontrol sang dengue.
Ang nasambit nga bulig suno sa provincial government ang nagatuyo agud mapabaskug ang mga programa sa pagkontrol sang lamok kag awareness campaign sang mga kabanwahanan; kag magbakal sang dugang nga medical supplies nga kinahanglanon agud mabatuan ang dengue outbreak.
Sa idalom sang EO, gamiton ang bulig pinansyal para sa mga hilikuton sa pagkontrol sang dengue vector, lakip ang pagbakal sang mga larvicides, adulticides, kag mga sprayer para sa indoor residual spraying (IRS) kag fogging; samtang ang nabilin nga pundo mahimo nga igahin para sa mga information campaign angut sa dengue kag iban pa nga medical supplies.
Dapat man nga maubos gamit sang LGUs ang pondo nga ginkuha halin sa Provincial Disaster Risk Reduction and Management Fund sa Disyembre 31, 2024 bangud ang mabilin diri ang kinahanglan nga ibalik sa gobyerno probinsal.
Ginpaathag ni LMP-Iloilo Executive Vice President for Internal Affairs kag Badiangan Mayor Suzette Mamon nga nagalain-lain ang kantidad nga ginhatag sa mga LGU depende sa kategorya sang mga banwa.
Ginpahayag sini nga nakabaton sang P300,000 nga ayuda ang mga dalagko nga LGUs – Cabatuan, Calinog, Carles, City of Passi, Dumangas, Janiuay, Lambunao, Miag-ao, Oton, Pavia, Pototan, Santa Barbara kag Tigbauan; samtang ang middle class municipalities – Ajuy, Alimodian, Anilao, Balasan, Banate, Barotac Nuevo, Barotac Viejo, Concepcion, Dingle, Dueñas, Estancia, Guimbal, Igbaras, Leganes, Lemery, Leon, Maasin, San Dionisio, San Enrique, San Joaquin , San Miguel, kag Sara – nakakuha sang P200,000; kag ang mga magagmay nga banwa – Badiangan, Batad, Bingawan, Mina, New Lucena, San Rafael, Tubungan, kag Zarraga – ang nakabaton sang P100,000 kada isa.
“The amount will be processed and released directly to the LGUs so that they can readily disburse the same in order to have an immediate intervention for the dengue cases in their respective municipalities,” pahayag ni Mamon.
Sa karon yara na sa state of calamity status ang bug-os nga probinsya bangud sa dengue kasunod sang pag-aprubar sang Sangguniang Panlalawigan sa rekomendasyon sang Provincial Disaster Risk Reduction and Management Council (PDRRMC).
Ang datos gikan sa Provincial Health Office (PHO) nagapakita nga ang probinsya nakarekord na sang 7,814 ka kaso sang dengue halin Enero 1 tubtob Agosto 31, 2024 nga may 20 ka napatay. Ini nagarepresentar sang 561.1 porsyento nga pagtaas gikan sa 1,182 ka kaso nga may duha ka napatay nga narekord sang nagligad nga tuig. (AAL/JNH/PIA Iloilo)
