SYUDAD SANG ILOILO (PIA) — Ginsapol sang Iloilo Provincial Disaster Risk Reduction and Management Office (PDRRMO) ang mga opisyal sang Municipal kag City Disaster Risk Reduction and Management Offices (DRRMOs) sa probinsya bilang pagpanghanda sa La Niña phenomenon.
Sang Hunyo 6, nagsapol ang mga DRRM officers sa probinsya kung sa diin ila naistoryahan kung paano mapabakod ang ila mga mekanismo sa tiun nga maapektuhan sila sang La Niña.
Ginpresentar man ni PDRRMO Chief Cornelio Salinas ang mga ideya sang Programs, Projects and Activities (PPAs) para sa National Disaster Resilience Month sa Hulyo.
Iya man ginpahayag nga importante para sa MDRRMOs nga magplano gilayon agud nga mangin handa sila sa tiun sang emerhensiya kag gintumod man ang importansya sang maayo nga koordinasyon para sa epektibo nga pagpatuman sang ‘”four thematic areas” sang Disaster Risk Reduction and Management (DRRM).
Nagpromisa man si Salinas nga suportahan ang mga kinahanglanon sang mga MDRRMO kag hatagan sila sang mga kagamitan para mas mapabaskog ang ila pagpanghanda kag malab-ot man ang ginahandum nga Gawad KALASAG award.
Ginpaathag naman sang Department of Science and Technology (DOST) – Philippine Atmospheric, Geophysical and Astronomical Services Administration (PAGASA) sa MDRRMOs ang lakat sang panahon sa bulan sang Hunyo sa Iloilo, pati na ang pagpang-andam sa ulan bangud sa pag-umpisa sang panahon sang bagyo.
Ginpakita man sang ahensya ang mga lokasyon kag functionality sang ila Automated Rain Gauges (ARG), Automated Water-Level Sensor (AWLS), kag Tandem Stations, nga nagaserbe nga Early Warning System (EWS) sa tiun sang pag-ulan. (AAL/JNH/PIA Iloilo)
