SYUDAD SANG ILOILO — Isa ka importante nga milestone ang naangkon sang Iloilo Provincial Hospital (IPH) bilang nahauna kag nagaisahanon nga DOH-certified HIV Confirmatory Laboratory sa probinsya sang Iloilo.
Sa ini nga sertipikasyon nga ginhatag sang DOH ukon Department of Health, sarang nga makapatigayon sang testing kag confirmatory laboratory procedures kasubong sang HIV/AIDS Testing kag Rapid HIV Diagnostics Algorithm (rHIVda) confirmatory test. Ini ang magapanubo sang kinahanglanon para sa diagnostic referrals sa Western Visayas Medical Center.
Ang dugang nga serbisyo magapasanyog sang ikasarang sang mga ospital sa idalom sang gobyerno probinsyal sa pagtanyag sang ikasarang sa pagtapna sang HIV/AIDS, pagbulong, pag-atipan, kag suporta sa mga pasyente.
Sa karon, may yara na sang tatlo ka mga HIV/AIDS treatment centers sa idalom sang gobyerno probinsyal kag ini ang ginabug-usan sang Rep. Pedro G. Trono Memorial Hospital sa banwa sang Guimbal, Jesus M. Colmenares District Hospital sa Balasan, kag Iloilo Provincial Hospital sa bahin sang Pototan. (AAL/LMLE/PIA)
