SYUDAD SANG ILOILO (PIA) — Ginkilala sang Iloilo Provincial Population Office ang banwa sang Zarraga bilang Best-Managed Population Data Bank Champion angot sa pagpatigayon sang hilikuton kag inobasyon nga nagapansayog sa paghatag sang de kalidad nga datos nga nagabulig sa gobyerno, buluthuan kag mga institusyon sa paghimo sang polosiya.
Nalakip man sa ginpasidunggan ang banwa sang Tigbauan kag Santa Barbara bilang nagapangaduha kag nagapangatlo.
Ang mga tagdaug ang ginpasidunggan sa hiwatan sang 2024 Barangay Service Point Officers Congress sang Nobyembre 18, 2024.
Ginakabig ang data banking and management bilang isa ka procedural task nga nagalakip sang epektibo nga pagkuha, pag-file, pagsiguro, pagproseso kag kabug-usan nga pagdumala sang datos sang populasyon.
Para kay PPO Chief Atty. Ruel Von Superio, ang ginhiwat nga Congress nagasaulog sang dedikasyon, perseverance, kag saad sang mga BSPO sa ila kontribusyon tuhoy sa serbisyo publiko.
“Ang ini nga adlaw, para ini sa aton mga dedikado kag mapisan nga mga BSPOs – you are a pillar of strength, compassion, and leadership in your respective barangays. Kay ang inyo gina obra sa pagtipon, pagtatap kag pag-update sang mga datus naga-balik ang kapuslanan kag kaayuhan sa aton barangay,” pahayag ni Superio. (AAL/LMLE/PIA Iloilo)
