SYUDAD SANG ILOILO (PIA) — Nagdaog ang gobyerno probinsyal sang Iloilo sa ginhiwat nga EXCELL ukon Excellence in Local Governance (EXCELL) Awards nga ginpangunahan sang Department of the Interior and Local Government (DILG).
Nalakip sa mga awards nga nabaton amo ang Excellence in Sustainable Education, Excellence in Social Protection and Sensitivity, Excellence in Health Compliance & Responsiveness, kag Excellence in Environmental Management.
Ginkilala man ang Iloilo sa mga madamo sini nga inisyatibo kasubong sang bulig pinansyal para sa repatriated Overseas Filipino Workers (OFWs), programa tuhoy sa malnutrition-free Iloilo, provincial educational assistance para sa miyembro sang Indigenous Peoples, kag coastal greenbelt for biodiversity conservation and coastal protection program.
Ginbaton ni Provincial Administrator Raul Banias ang award bilang representante ni Gov. Arthur Defensor, Jr., kaupod ang mga hepe sang mga natungdan nga mga talatapan.
Ang EXCELL Award isa ka proyekto sang DILG-6 nga nagakilala sa mga pinakamaayo nga mga lokal nga panguluhan nga nagapakita sang best practices, mga kadalag-an kag inobasyon sa pang-gobyerno, admnistrasyon, pag-uswag sa ekonomiya, lokal nga lehislasyon, social services, kag environmental management. (AAL/LMLE/PIA Iloilo)
