SYUDAD SANG ILOILO (PIA) — Ginpanginbulahan ang Iloilo River esplanade nga proyekto sang syudad sang Iloilo sa ginhiwat nga 2024 Asian Townscape Awards (ATA) sa Fukuoka, Japan.
Ang ini nga pasidungog nagahatag pagtamod sa mga syudad, rehiyon, ukon proyekto nga may yara sang dako nga bahin bilang modelo sa landscape construction.
Madumduman nga sa pagbukas sang river esplanade sa publiko sang 2012, ini ang ginkabig bilang pinakamalaba nga promenade kag linear park sang pungsod kun sa diin ini ang nagalab-ot sa siyam ka kilometro kag nagasangkad sa magtimbang nga kilid sang suba.
Ginabug-usan ini sang 13 ka seksyon kag nagakonekta sa 11 ka mga taytay, kag nasakop sa lima ka distrito sang syudad. Ang ini nga proyekto ang padayon nga ginapalapad.
Ginbaton ni City Planning and Development Office head Ronald Cartagena ang pasidungog sang Nobyembre 18, 2024.
Sa isa ka press statement, ginpahayag ni Mayor Jerry Treñas nga ang ini nga pagkilala ang testamento sang city government tuhoy sa panan-awan kag pangako sa pagtinguha sang tayuyon nga pag-uswag sang kasyudaran.
“This award reaffirms Iloilo City’s position as a model of sustainability and urban excellence, inspiring other cities to pursue similar initiatives. We extend our heartfelt gratitude to all stakeholders, past and present, who have contributed to this remarkable project,” suno kay Treñas.
Ginkilala man ni Treñas ang pagpanguna sang anay Ilonggo nga senador Franklin Drilon sa pagdevelop sang Iloilo river kag ang palibot sini
Samtang, ginapangunahan sang UN-HABITAT Regional Office for Asia and Pacific (UN-HABITAT ROAP), Asian Habitat Society (AHS), Fukuoka Asian Urban Research Center (URC), kag Asia Townscape Design Society (ATDeS) ang paghiwat sang ATA. (AAL/LMLE/PIA Iloilo with reports from Iloilo City Gov’t)
