SYUDAD SANG ILOILO (PIA) — Magabukas na sa trapiko ang Iloilo River North Bank Road nga kilala bilang “Iloilo Sunset Boulevard,” sa Enero 24 sini nga tuig. Ini ang ginhayag ni Department of Public Works and Highways (DPWH) 6 Regional Director Sanny Boy O. Oropel.
Ang P2.261-bilyon nga multi-year nga proyekto natunga sa tatlo ka seksyon lakip na ang konstruksyon sang lima ka kilometro nga four-lane Portland Concrete Cement Pavement (PCCP) road.
Sakop sang proyekto ang Molo-Mandurriao Road, ilabi na ang Barangay Tabucan sa Mandurriao, Iloilo City, pakadto sa Iloilo Business Park (Megaworld), kag nagalab-ot sa Oton-Pakiad-Mandurriao Road, sa Barangay Cagbang, Oton.
Ini naga-intersect man sa Iloilo Circumferential Road, nga nagahatag sang kritikal nga koneksyon sa munisipalidad sang Tigbauan, Iloilo.
Ang Iloilo River North Bank Road project, nga ginpatigayon sang DPWH 6, amo isa sa mga “standout initiatives” nga ginpangunahan ni anay Ilonggo Senator Franklin M. Drilon.
Ang proyekto nasandig man sa pangako sang Departamento nga ma-decongest ang trapiko paagi sa pagbukas sang mga bag-o nga dalan lakip na ang by-passes.
Ini gin-ebalwar man sing husto pamaagi sa feasibility study nga ginapatigayon sang DPWH para masiguro nga nalambot kag sandig ini sa mga polisiya sang ahensya. Ginasuportahan man sini ang ginatan-aw sang DPWH nga makahatag sang luwas, masaligan, kag mabakod nga imprastraktura nga maga-improba sa kabuhi sang tagsa ka Pilipino.
Ang boulevard naga-feature man sang madamo nga mga pasilidad kaangay sang esplanade, viewing decks, bike lanes, paved nga walkways, kag softscapes.
“Like the existing esplanade projects along Iloilo River, Iloilo Sunset Boulevard have bike lanes that will provide a conducive passage for our cyclists and sports enthusiasts,” pagpa-athag ni Oropel.
Suno sa DPWH, ang Iloilo River North Bank Road project ukon Iloilo Sunset Boulevard nagaserbe bilang isa ka pinasahi nga modelo sang husto nga pagplano kag epektibo nga pagpatuman, nga amo magahatag sang benepisyo sa komunidad. Ini ginalantaw man nga makapahagan-hagan sang trapiko kag mas magapabaskog sang koneksyon sang syudad kag nagkalainlain nga mga kabanwahanan. (AAL/AGP/PIA 6 kalakip ang mga balita gikan sa DPWH 6)
