SYUDAD SANG ILOILO (PIA) – Nagpasalig ang Iloilo nga suportahan ang tinutuyo ni Presidente Ferdinand “Bongbong” Marcos Jr., pinaagi sa National Anti-Poverty Commission (NAPC), nga mapanubo ang poverty rate sang pungsod sa single-percentage sa katapusan sang iya termino sa 2028.
Sa pagsaulog sang National Day for Overcoming Extreme Poverty sang Oktubre 17, 2024, ginpahayag ni mayor Niel Tupas sang Barotac Viejo nga ang Iloilo, partikular ang iya munisipyo, naga-isa sa katuyuan sang NAPC sa pagpakig-away batok sa kaimulon, kung sa diin may ara man sang mga panikasog ang mga lokal nga panguluhan sa probinsya para sa ikabenipisyo sang ila mga komunidad.
“Iloilo is one with the goal of NAPC to eradicate poverty. On our part in Barotac Viejo, we have different programs implemented to support this agenda through our scholarship programs for students and assistance to our less privileged constituents through our social services,” siling ni Tupas.
Ang selebrasyon sa bug-os nga pungsod, kung sa diin nagserbe ang Barotac Viejo bilang isa sa mga host-LGUs sa pungsod, ang may tema nga, “Ending Social and Institutional Maltreatment: Acting Together for Just, Peaceful, and Inclusive Societies,” nga nagakilala sang importansya sang pag-ugyon kag “whole-of-society approach” sa pag-atubang sa problema sang kaimulon.
Ginpahayag ni NAPC undersecretary si Esnaen “Teng” Catong sa iya mensahe ang importansya sang paghiliusa sa tunga sang stakeholders para sa pag-angkon sang lima ka mga nagapanguna nga kinamatarung sang mga imol nga ginalakipan sang kinamatarong sa nagakaigo nga pagkaon; kinamatarong sa disente nga trabaho; kinamatarong sa nagakaigo kag dekalidad nga edukasyon; kinamatarong sa nagakaigo nga pabalay; kag mataas nga estado sang ikaayong lawas.
Ang datos gikan sa NAPC nagapakita nga ang pungsod nakahimo na sang isa ka daku nga tikang sa pagpanubo sang insidente sang kaimulon sa bug-os nga pungsod halin sa 18.1 porsyento sang 2021 pakadto sa 15.5 porsyento sang 2023. Si Presidente Marcos, bilang chairman sang NAPC, nagalaum nga mas mapanubo pa ini sa katapusan sang iya termino.
Ang NAPC ginabug-usan sang 24 ka mga ahensya sang gobyerno, apat ka mga liga sang gobyerno lokal, kag 14 ka mga nagapanguna nga sektor, kung sa diin ginsiling ni Catong nga padayon nila ini nga ginabantayan agud masiguro nga ang tanan nga mga programa kag mga polisiya nga ginapatuman sang sini nga stakeholders nagasanto sa mga kinahanglanon sang komunidad.
“We are making it a point that the programs of the agencies will be properly monitored in order for them to reach the intended beneficiaries for us to achieve our goal. This isn’t just the goal of the President, but the goal of everyone, including the underprivileged to eradicate poverty,” pahayag sini.
Samtang, bilang kabahin sang ila suporta batok sa kaimulon, ang nagkalain-lain nga stakeholders, sa pagpanguna ni USec Catong, NAPC director Nelson Tupas, kag mayor Tupas nagpirma sang Pledge of Commitment, nga nagasimbolo sang kooperasyon kag suporta para sa panawagan nga tapuson ang kaimulon kag ibayaw ang estado sang mga imol padulong sa kabuhi nga may dignidad.
Bilang parte sang kahiwatan, naghatag man sang ila serbisyo sa mga residente ang Social Security System (SSS), Department of Social Welfare and Development (DSWD), kag Office of Civil Defense (OCD); kag isa ka wreath laying activity ang ginhiwat para sa replica sang commemorative stone marker ukon “Bato ng Buhay” sa atubang sang Municipal Gym, nga nagaserbe nga pahanumdom sa padayon nga kampanya sa pagbato sa kaimulon. (AAL/JNH/PIA Iloilo)
