SYUDAD SANG ILOILO (PIA) – Naghiwat sang isa ka learning tour sa syudad ang mga information officers gikan sa syudad kag probinsya sang Iloilo, lakip ang mga Barangay Information Officers (BIOs), sang Marso 21, 2025, kun sa diin ginhatagan sila sang kahigayunan nga makabisita sa nagkalain-lain nga mga sikat nga lugar sa syudad kag mag-obserbar kag magtuon gikan sa ‘best practices’ sang gobyerno sang syudad sa serbisyo publiko.
Ang kahiwatan nga gin-organisar sang Iloilo-Guimaras Information Officers Association (IGIOA) kag Philippine Information Agency (PIA) – Iloilo kaupod ang Iloilo City government, nagpakita sang pila ka mga inisyatibo nga ginpatuman sang city government, lakip na ang Graciano Lopez Public Library kag ang Iloilo City Action and Resilience (ICARE) Center.
Ang inisyatibo sang Iloilo City Public Library nagahatag sa mga estudyante sang isa ka luwas nga lugar sa pagtuon sang ila mga leksyon kag nagatugot sa ila nga maka-access sang nagkalainlain nga mga serbisyo, pareho sang libre nga koneksyon sa Wi-Fi, paggamit sang mga desktop computer, kag pagbasa sang madamo nga sahi sang mga libro.
Sa pihak nga bahin, ang ICARE centralized emergency operation center kag ang mga satellite sini nagatuyo sa paghatag sa syudad sang isa ka integrated response network nga nakabase sa tagsa ka distrito kag magdala sang mga serbisyo sa kaluwasan mas malapit sa publiko.
Sa pagbisita sang mga information officers sa ICARE Command Center sa Gaisano City Center, distrito sang Mandurriao, ginpahayag ni City Disaster Risk Reduction and Management Office (CDRRMO) head Donna Magno nga ang tagsa ka ICARE center ang nagabalay sang mga kinahanglanon nga serbisyo pareho sang pulis, CDRRMO, Public Safety and Transportation Management Office, kag mga tinawo sang sunog para mas madasig ang pagresponde sa tiun sang mga emerhensya.
Ang implementasyon sang ICARE centers ang instrumento para sa kadalag-an sang siudad bilang isa ka kampeon sang DRRM, kasunod sang ila ikatlo nga sunod-sunod nga Gawad KALASAG (KAlamidad sa Sakuna LAbanan SAriling Galing ang Kaligtasan) Award sang 2024.
Magluwas sa duha ka pasilidad, nagbisita man sa iban pa nga kilala nga mga lugar sa syudad ang mga information officers, pareho sang Maritime Museum, Casa Maruja, Molo Mansion, Sunset Boulevard, kag Brandy Museum, nga nagaamot sa nagadaku nga industriya sang turismo sang syudad.
Para kay Hannah Chavez, information officer sang Passi City, ang learning tour ang naghatag sa iya sang ihibalo kag estratehiya kun paano man mapabugal ang ila banwa sa mga bisita kag ma-replicate ang madinalag-on nga mga programa sang syudad sang Iloilo.
Samtang, ginpahayag ni Iloilo City information officer kag IGIOA president Lucy Sinay, nga ang kahiwatan isa ka pamaagi agud mapakita ang manami nga kaladtu-an sa syudad kag para mahibaluan sang iya mga kaupdanan nga information officers kun paano ginapatuman sang city government ang ila mga programa para sa kaayuhan sang komunidad. (AAL/JNH/PIA Iloilo)
