Laragway: DA Western Visayas
SYUDAD SANG ILOILO (PIA) — May tema nga “Bugay sang agrikultura kag pangisdaan aton pasanyugon; panginbulahan sa aton kag sa sunod henerasyon,” gindala sang Department of Agriculture (DA) Western Visayas ang Agricultural Information Caravan kag Technology Forum bilang highlight sang pagsaulog sang Farmers and Fisherfolk’s Day sa banwa sang San Dionisio, Iloilo.
Masobra 200 ka mga mangunguma kag mangingisda halin sa nagkalain-lain nga mga barangay ang nakigbahin sa caravan nga ginalantaw pataason ang pag-intindi sang agricultural stakeholders sang mga buluhaton pang-agrikultura kag pangisdaan, technology transfer kag adoption, kag idul-ong palapit ang mga serbisyo sang DA Western Visayas.
Ginkilala ni San Dionisio Executive Assistant II Bonifacio D. Camilan ang importante nga kontribusyon sang mga mangunguma kag mangingisda bilang mga baganihan sang kalibutan bangud sa paghatag kag pagsustenir sang pagpauswag sang komunidad kag kasiguraduhan sa pagkaon. Samtang, ginpunto ni Municipal Agriculturist Marie Vic C. Abiar ang importansya sang pagkilala kag pagselebrar sang mga pagpanikasog kag kadalag-an sang sektor sang agrikultura.
Ginpalab-ot naman ni Iloilo Provincial Agriculturist Ildefonso T. Toledo ang iya apresasyon sa sektor bangud sa padayon nga pagsuporta sa mga inisyatibo sang lokal nga panguluhan sang probinsya sang Iloilo sa pagbulig sa mga pigado nga mga panimalay, ilabi na sa 12,000 ka mga pamilya nga may malnourished nga mga kabataan.
Iya man ginhatagan pagtamod ang farm mechanization, livestock kag poultry interventions, kag mga pagpanikasog sa bahin sang fisheries kag coastal conservation nga nasanto sa pagpasangkad sang produksyon kag pagtaas sang income sang mga indibidwal nga mga mangunguma.
Sa pihak nga bahin, si Maria Aimee A. Sobrevega, OIC-Chief sang Provincial Fisheries Office ginpahibalo sa liwat ang suporta sang ahensya sa sektor sang pangisdaan.
Samtang, si Elvin Rutor, Coconut Development Officer sang Philippine Coconut Authority (PCA), ang nagpresentar sang mga serbisyo kag assistance programs sang ahensya.
Ang Information Officer II sang DA-WV naman nga si Myleen S. Subang gin-agda ang mga mangunguma kag mangingisda nga padayunon ang pagsakdag sa mga inobasyon, science-based approaches, kag climate-resilient nga mga teknolohiya sa patag sang agrikultura kag pa ngisdaan. Iya man ginhatagan pagtamod ang padayon nga komunikasyon sa tunga sang mga mangunguma kag agricultural extension workers (AEWS) para masiguro ang epektibo kag maayo nga pagroll-out sang science-based technologies.
Si Rilyn Castro sang Iloilo Agricultural Program Coordinating Office ginpakigbahin naman ang mga programa kag proyekto nga gin-implementar sa San Dionisio.
Nagpahayag naman sang pagpasalamat si MAFC chairperson Jimmy Plantig sa DA-Western Visayas sa ila pagpaambit sang mga interbensyon kaangay sang mga rice seeds kag abono. Iya man gin-agda ang mga kaangay nga mangunguma nga i-update ang ila rehistrasyon sa Registry System for Basic Sectors in Agriculture (RSBSA) para makakuha sang bug-os nga bulig halin sa gobyerno.
Ang programa gin-feature man ang pito ka farmer-fisherfolks nga nakigbahin man sang ila istorya sang kadalag-an. Isa sa ila amo si Mar John Morales, Young Farmers Challenge (YFC) Regional Awardee kag isa ka high-value commercial crop grower, nga nakigbahin sang iya mga inagyan kag mga estratihiya sa pagtukod sang isa ka madinalag-on nga grape farming enterprise. (AAL/AGP/PIA 6 kalakip ang mga balita gikan sa DA Western Visayas)
