SYUDAD SANG ILOILO (PIA) — Nangin madinalag-on ang ginhiwat nga Capacity Building Activity for Sustainable Government Information Work nga ginbug-usan sang mga miyembro sang Iloilo-Guimaras Information Officers Association (IGIOA), Philippine Information Agency – Iloilo, kag League of Municipalities of the Philippines (LMP) – Iloilo.
Luyag sang ini nga hilikuton nga mahanas ang ikasarang sang mga Information Officers kun sa diin sila ang may dako nga bahin sa pagpaalintun sang mga programa kag hilikuton sang gobyerno.
Isa sa mga dinapit nga bisita si PIA 6 Regional Head Cheryl Amor nga nagtalakay sang mga responsibilidad sang Barangay Information Officers bilang information front liners nga nagasuporta sa mga inisyatibo sang gobyerno, nagapalapnag sang impormasyon sa publiko pinaagi sa nanari-sari nga mga plataporma sang komonikasyon.
Nangin kabahin man ang mga kawani sang Commission on Elections (COMELEC)-Iloilo nga sanday Election Officers Noredith Pagcaliwangan kag Ma. Elisa Bernal sa ini nga hilikuton pinaagi sa pagdiskusyon sang Voter’s Registration kag mga importante nga pahibalo tuhoy sa pagahiwaton nga nasyunal kag lokal nga eleksiyon sa 2025.
Nangin kabahin man ang mga kawani sang Commission on Elections (COMELEC)-Iloilo nga sanday Election Officers Noredith Pagcaliwangan kag Ma. Elisa Bernal sa ini nga hilikuton pinaagi sa pagdiskusyon sang Voter’s Registration kag mga importante nga pahibalo tuhoy sa pagahiwaton nga nasyunal kag lokal nga eleksiyon sa 2025.
Sa pihak nga bahin, ginpaalintun ni Prof. Raffy Galan ang importansiya sang good public speaking skills ukon pag-angkon sang maayo nga abilidad sa pagpamulongpulong sa publiko bilang kabahin man sang buluhaton sang Information Officers
“As Information Officers, indi lang nga kabalo sila magsulat, of course, kinahanglanon man sa communication aspect and function nila sa job nga kabalo sila maghambal kag mag-atubang sa tawo. Although may ara na ina sila strong foundation in communications, pero ining activity and workshop in public speaking, makapadugang pa gid sang improvement sang ila skills,” pahayag ni Galan.
Si Galan ang nagtalakay man sang Hiligaynon 101 kun sa diin ang lenggwahe ang may dako nga bahin sa pagpakig-angot sa mga pumuluyo kag gilayon nga mahangpan sini ang mga impormasyon.
Nagbisita man ang mga partisipante sa Igang Marine Station (IMS) sang Southeast Asian Fisheries and Development Center (SEAFDEC) agud makilala ang mga nagkalain-lain nga mga pasilidad kag mga aquaculture nga buluhaton.
Gintukod ang nasambit nga istasyon sang 1974 sa tinutuyo sang panalawsaw kag matun-an ang breeding sang tiger shrimp. Samtang, ang mga nursery kag iban pa nga mga teknolohiya ang gindevelop para sa mga matag-as nga mga balor sang espesyi kaangay sang grouper, sea bass, snapper, kag pompano nga isda.
Para naman kay Jan Edward Loriega, Information Officer sang banwa sang Igbaras, ang paghiwat sang Capacity Building isa ka maayo nga inisyatibo ilabi na sa mga lokal nga panguluhan nga magatuga pa lamang sang ila nga Information Office.
“Na-enhance akon public engagements kag pwede ko ni ma-apply sa akon staff para aware sanda sang flow sang government information,” suno kay Loriega.
Ginhiwat ang Capacity Building Activity sa bahin sang Nueva Valencia, probinsya sang Guimaras sadtong Hunyo 6-7 kun sa diin ginsakdagan ini sang banwa sang Ajuy, Banate, Batad, Buenavista-Guimaras, Calinog, Dumangas, Dueñas, Igbaras, Lambunao, Oton, Tubungan, Iloilo City, Passi City, Iloilo Provincial Police Office, LMP-Iloilo, probinsya sang Iloilo kag Guimaras. (AAL/LMLE/PIA Iloilo)
