SYUDAD SANG ILOILO (PIA) — Hiwaton sa Taklong Island National Marine Reserve (TINMAR) sa Nueva Valencia, Guimaras ang ika-tatlo nga leg sang International Open Water Swim Circuit sa Hunyo 29-30, 2024.
Sa isa ka press conference sang Hunyo 19, ginpahayag ni Department of Tourism (DOT) 6 Director Crisanta Marlene P. Rodriguez nga magluwas sa pagtanyag sang open water swimming, katuyuan man sang programa nga mapalapnag ang importansya sang environmental sustainability.
Gindugang pa ni Rodriguez nga 150 lang ka personalidad ang pahanugutan nga mag-intra sa Open Water Swim Circuit nga may ara sang tatlo ka kategorya – 2.5km, 5km, kag 7km – bangud nga isa ang TINMAR sa 372 ka marine protected areas sa pungsod kag kinahanglan nga amligan ang dunang manggad sini.
“It’s a different kind of event in the sense that it is a tourism event, but at the same time it focuses on the conservation and protection of our marine environment,” siling ni Rodriguez.
Sa pihak nga bahin, ginpahayag man ni Sangguniang Panlalawigan Tourism Committee Chairman Felipe Nava nga dako ang mabulig sang programa para sa padayon nga pagsanyog sang turismo kag ekonomiya sang isla.
“We are maximizing the potential of Guimaras. We still have lots of assets that need to be utilized and this international open swim completion is another asset for Guimaras,” pahayag ni Nava.
Ginpasiguro man sini ang seguridad sang mga magapasakop sa Open Water Swim Circuit pinaagi sa bulig sang Philippine National Police (PNP) kag Philippine Coast Guard (PCG).
Una na nga ginhiwat ang Open Water Swim Circuit sa Sipalay City, Negros Occidental kag Sicogon Island, Carles, Iloilo, samtang ang ika-apat nga leg ang pagahiwaton sa Boracay Island sa Setyembre 22. (AAL/JNH/PIA Iloilo)
