SYUDAD SANG ILOILO (PIA) — Ginlagdaan na sang 50 ka mga iskolar nga Indigenous Peoples (IPs) ang ila nga kontrata kabahin sang Provincial Educational Assistance Program for IPs and members of Indigenous Cultural Communities (ICCs).
Nagikan ang ini nga mga iskolar sa kabanwahanan sang Alimodian, Anilao, Barotac Viejo, Calinog, Guimbal, Janiuay, Lambunao, Maasin, Leon, Pototan, San Rafael, kag Tubungan.
Ginpanginbulahan ni Acting Provincial Social Welfare and Development Officer (PSWDO) Rani Melvi Cuarte ang mga estudyante bangud sila ang napilian sa kapin 273 nga mga aplikante.
Ginapat-od ni Cuarte ang dako nga importansya sang kadalag-an sa edukasyon.
“IP grantees’ success in education does not only reflect a promise in the improvement of life of their families but it can also be considered as a victory for their communities,” pahayag ni Cuarte.
Kabahin man sa mga nagtambong sa aktibidad ang mga representante sang National Commission on Indigenous Peoples (NCIP) Regional Office VI kag Department of Education (DepEd) Division of Iloilo kun sa diin sila ang nalakip man sa technical working group.
Nagpabutyag sang pagpasalamat si Vima G. Latoza sang NCIP-6 sa gobyerno probinsyal tuhoy sa padayon nga mga hilikuton sa pagsuporta sa edukasyon sang IP para sa ikaayo sang pangabuhi.
Iya man nga ginpanugyan sa mga iskolar nga huptan ang ila kultural nga identity kag mga tradisyon.
Samtang, ginpaalintun ni IP Focal Person Marice Andrea Bedonia ang mga responsibilidad sang mga iskolar kag ang mga benepisyo nga gintanyag sang gobyerno probinsyal.
Madumduman nga taga tuig nagabaton ang Provincial Educational Assistance Program sang 50 ka mga IP nga iskolar agud mabuligan sila sa pag-eskwela sa kolehiyo kag mangin kabahin sa progreso sang ila komonidad. (AAL/LMLE/PIA Iloilo with reports from Capitol)
