SYUDAD SANG ILOILO (PIA) – Ginpabaskog sang Iloilo Provincial Health Office (IPHO) ang ila kampanya kontra sa dengue sa mga komunidad bangud sa pagtaas sang kaso sini sa probinsya.
Ginpahayag ni IPHO head Dr. Maria Socorro Quiñon nga naalarma na sila sa pagsaka sang mga kaso gani dapat nga maghalong ang tanan kag makigbahin sa pagpatigayon sang anti-dengue clean-up drives sa komunidad.
Ginpasalig man ni Quiñon ang mga rural health units (RHUs) nga ang gobyerno probinsyal magahatag sang nagakaigo nga pondo para sa ila mga interbensyon sa pagpakig-away sa dengue, lakip na ang pagbakal sang dengue test kits, mga bulong, mga materyales para sa mga kampanya sa impormasyon kag edukasyon, kag para sa fogging kag indoor residual spraying agud makontrol ang populasyon sang lamok.
“Our staff in the PHO will go to all the towns to help ensure that 4S strategies (Search and destroy breeding places, Seek early consultation, Self-protection, Say yes to fogging and spraying) are being implemented. We ask the public to take all the preventive measures seriously and for the barangay officials to support the campaign through the Aksyon Barangay Kontra Dengue,” siling ni Quiñon.
Ang datos gikan sa Provincial Epidemiology and Surveillance Unit (PESU), nagapakita nga ang probinsya may-ara sang 385 ka kaso sang dengue, lakip ang apat ka napatay humalin sang Enero 1 tubto Pebrero 1. Ini ang 58 porsyento nga mas mataas kon ipaanggid sa 244 ka kaso nga wala sing narekord nga patay sa parehas nga tiun sang 2024.
Ang apat mga napatay ginalakipan sang 67 anyos nga babaye kag 6 anyos nga lalaki nga halin sa banwa sang Pototan, 71 anyos nga lalaki nga taga Carles, kag 11 ka bulan nga bata nga lalaki nga taga banwa sang Oton.
Ginhingyo naman ni Quiñon ang publiko nga magpakonsulta sa pinakamalapit nga RHU kung may ara nabatyagan nga sintomas sang dengue agud indi na ini maglala pa kag gilayon nga mabulong.
Lakip sa mga sintomas sang dengue ang pagsakit sang ulo, pagbatyag sang kakapoy, indi mapahamtang, ukon iritable, nausea, rash, kag pagsakit sang mata, tul-an kag maskulo. (AAL/JNH/PIA Iloilo)
