SYUDAD SANG ILOILO (PIA) – Nagpahanumdom ang Iloilo Provincial Health Office (IPHO) sa publiko nga responsable nga saulugon ang Paskwa kag Bag-ong Tuig, pinaagi sa pagsunod sa “Ligtas Christmas” nga kampanya sang Department of Health (DOH).
Ang “Ligtas Christmas” nga kampanya sang DOH ang ginalakipan sang “BiyaHealthy”, “Healthy Handaan”, kag “Iwas Paputok” nga kampanya, kun sa diin ini ang pila ka mga prayoridad nga dapat ginabantayan sa pagsaulog sang holiday season.
Ginpahayag ni IPHO head Dr. Maria Socorro Quiñon nga dapat mangin prayoridad sang tagsa ka pamilya ang ila ikaayong lawas sa pagsaulog sang holiday season bangud mas masadya kag manami ang selebrasyon kung wala sang emerhensiya.
Para sa mga pamilya nga hilig mag-biyahe, ginpahayag ni Quiñon nga mangin responsable sa pag-drive sang salakyan kag magsuksok sang helmet kung motor ang ginagamit.
“Ensure gid nga safe ang aton salakyan, drive safely. Sa salakyan, indi man mag over speeding kag observe gid ang traffic rules,” siling ni Quiñon.
Samtang, ginpahayag ni Quiñon nga sa idalum sang “Healthy Handaan”, dapat matinlo kag masustansiya ang mga pagkaon nga ginapreparar para sa selebrasyon agud malikawan man ang mga emerhensiya sa ikaayong lawas.
Dugang pa sini nga mas manami kung personal na lang ang pagluto sang mga pagkaon kag indi na magbakal pa sa restaurants agud masiguro ang katinlo sang pagkaon nga kaunon sang pamilya.
“As much as possible kita na lang mismo magluto sang aton pagkaon para sigurado nga safe, kag kung kita mag-preparar sang aton pagkaon, kinahanglan nakapanghugas kita sang kamot, ang aton fruits and vegetables ginhugasan maayo,” siling sini.
Suno sa iya, dapat man nga likawan ukon limitahan ang mga maalat, matam-is, kag mamantika nga mga pagkaon subong nga holiday season agud malikawan ang komplikasyon kag emerhensiya sa ikaayong lawas, parehas sang high blood pressure, kag pagtaas sang sugar level.
“So, amu na siya, lesser ang salt, sugar, and fat intake, kag ang alcohol, if possible, avoid gid, or kung indi gid ma prevent, dapat in moderation lang para ma-avoid ang further complications,” siling ni Quiñon.
Sa pihak nga bahin, isa man sa ginahatagan prayoridad sang IPHO amu ang paglikaw sa paggamit sang mga palupok subong nga holiday season, kung sa diin dapat gid nga bantayan ang mga kabataan kontra diri.
“Gina-encourage lang naton ang fireworks display sa aton mga banwa, and as much as possible, mga torotot na lang bala usaron naton nga pahunihon kay amu ma lang na ang purpose nga mag-enjoy kita and have the gathering of family and friends as we celebrate the holiday season,” pahayag ni Quiñon. (AAL/JNH/PIA Iloilo)
