SYUDAD SANG ILOILO (PIA) – Ginpabaskog pa sang Iloilo Police Provincial Office ang ila operasyon batuk sa mga ilegal nga aktibidad sa probinsya.
Sa 1st quarter Provincial Peace and Order Council (PPOC) meeting sang Marso 2025, ginbuyagyag sang IPPO nga nakahimo sila sang 66 ka operasyon batok sa iligal nga droga halin Enero 1 tubtob Marso 12, 2025, nga nagresulta sa pagkadakop sang 66 ka mga indibidwal kag pagkumpiskar sang 4,670 ka gramo sang shabu nga nagabalor P31,760,543.
Ginpahayag man sang IPPO nga nakapatigayon sila sang 370 ka operasyon batok sa ilegal nga droga sang tuig 2024, nga mas mataas kun ipaanggid sa 303 lamang ka operasyon nga nahimo sang 2023. Ang kampanya nagresulta sa pagdakop sang 478 ka mga indibidwal kag pagkumpiskar sang 13,892 ka gramo sang shabu nga nagabalor sang P944,46444.
Para sa ila kampanya batok sa ilegal nga sugal, nagpatigayon sang 22 ka operasyon ang kapulisan humalin Enero 1 tubtub Marso 12, 2025 nga nagresulta sa pagkadakop sang 62 ka mga persona kag pagkumpiskar sang pot money nga nagabalor sang P23,206.
Nadakpan man sang IPPO ang 208 ka mga wanted persons kag nakumpiskar ang 36 ka mga armas luthang; samtang nadakpan man ang 115 ka mga persona nga nagahimo sang illegal fishing activities.
Ang mga kaso sang index crimes sa bug-os nga probinsya nagnubo man sa 739 sang 2024 kumpara sa 765 sang 2023.
Samtang, natuhoy sa preparasyon sang 2025 midterm elections, ginbuyagyag sang IPPO nga may ara sang walo ka election areas of concern sa probinsya nga ginalakipan sang mga banwa sang Badiangan, Janiuay, Alimodian, Maasin, kag San Joaquin sa idalum sang orange category; kag ang mga banwa sang Ajuy, Lemery, kag San Dionisio sa idalum sang yellow category.
Nagpangabay man ang IPPO sang augmentation personnel gikan sa Police Regional Office (PRO)-6 bangud kinahanglan ang dugang nga personnel agud masiguro ang pinakamaayo nga security coverage para sa 2025 elections. (AAL/JNH/PIA Iloilo)
