SYUDAD SANG ILOILO (PIA) – Ginpanginwala sang Iloilo Police Provincial Office (IPPO) ang pila ka mga ginaalegar insidente sang kidnapping sa probinsya.
Tungod sa mga nagalapta nga insidente sang kidnapping, ginhingyo man sang IPPO ang publiko nga i-verify ang impormasyon nga ila mabaton kag likawan ang pagpalapta sang indi kompirmado nga mga datos.
Ginpahayag ni IPPO director Police Colonel Bayani Razalan nga dapat mangin responsable ang tanan sa ila ginahulag bangud ang pagpalapta sang mga peke nga impormasyon ang pwede makaalarma sa publiko kag makatuga sang panic.
“We urged the public to refrain from spreading unverified information, as it can lead to unnecessary panic and reactions. Parents are encouraged to teach their children to be cautious about information from unreliable sources, particularly on social media,” siling ni Razalan.
Ginmanduan man sini ang tanan nga mga unit commander nga makig-angot sa mga otoridad sang eskwelahan agud ma-edukar ang mga estudyante sa importansya sang pag-verify sang mga impormasyon, ilabi na gikan sa social media.
“We are committed to raising public awareness about the dangers of believing and spreading fake news,” dugang pa ni Razalan.
Pila sa mga ginaalegar indi matuod nga kidnapping sa probinsya, suno sa IPPO, amu ang mga gin-report nga mga insidente sa banwa sang Pavia, Dumangas, kag Santa Barbara
Sunu sa kapulisan, wala sang konkreto nga ibedensya sa natabo nga mga insidente sa Pavia kag Dumangas, samtang ang menor de edad naman nga imbolbado sa insidente sa Santa Barbara amo ang isa ka child in conflict with the law (CICL) nga nakapalagyo samtang ginasaylo sang Municipal Social Welfare and Development Office (MSWDO) sang Pavia sa Santa Barbara.
Sa pihak sang mga indi matuod nga insidente sang kidnapping, ginpabaskog sagihapon sang IPPO ang presensya sang kapulisan sa mga eskwelahan kag nag-coordinate na sa Liga ng mga Barangay agud masiguru ang seguridad sang publiko.
“Your Ilonggo police are here, ready to provide our services to ensure the safety and security of our community,” siling ni Razalan. (AAL/JNH/PIA Iloilo)
