SYUDAD SANG ILOILO (PIA) –- Isa ka Memorandum of Understanding ang ginlagdaan sang Iloilo State University of Fisheries Science and Technology (ISUFST) kag CAMELEON Association, Inc. angot sa pagsakdag sang adbokasiya kasubong sang child protection, gender and development, edukasyon, ikaayong lawas, kag programa sa komonidad.
Napaidalom man sa MOU ang pagpatigayon sang community extension, capability building, pagpanalawsaw, paghanas, adbokasiya, pag-integrar sang suporta sa akademiko pinaagi sa mga serbisyo sa psychosocial, legal, kag palangabuhian kun sa diin ini ang ginahatag sang CAMELEON sa ila mga benepisyaryo.
Kilala ang CAMELEON bilang isa ka nonprofit organization nga nagasuporta kag naga-amlig sa mga kabataan.
Suno kay CAMELEON Executive Director Cornelia Udani, ini ang nahauna nga kahigayonan nga maka-partner ang organisasyon sa isa ka higher education institution.
“It gives us hope for more meaningful projects and programs for our scholars and partner communities. We are proud to take this step with ISUFST,” pahayag ni Udani.
Sa bahin ni ISUFST President Dr. Nordy Siason, Jr., nagapakita naman ang partnership sang mas madalom nga panawagan sa pagsakdag sang importansya sang social justice.
Magluwas man sa pagtudlo, ginpahayag ni Siason nga ang unibersidad padayon sa pagserbe, pagbulig, kag pagahatag kusog ilabi na sa mga pamatan-on.
“Social justice must not remain in our mission statements—it must live in our classrooms, our programs, and how we welcome every student with compassion and care,” pakigbahin ni Siason. (AAL/LMLE/PIA Iloilo with reports from ISUFST)
