SYUDAD SANG ILOILO — Nagpabutyag sang kalipay ang gobyerno sang South Korea tuhoy sa inagurasyon sang mga dam sang Jalaur River Multi-purpose Project (JRMP) II nga magabulig pasanyog sang rural development kag paghatag solusyon sa mga pagpanghangkat.
Ginakabig ni Ambassador of the Republic of Korea (ROK) to the Philippines Lee Sang-hwa ang proyekto bilang pinakadako nga dam sa Visayas kag game changer sa pag-atubang sa mga kritikal nga mga hangkat sang pungsod ilabi na sa pagpasiguro sang seguridad sang pagkaon, pagsuporta sa agrikultura, kag pag-enhance sang climate resilience.
Kaupod si Ambassador Lee sa pag-inagurar sang JRMP II sa banwa sang Calinog nga ginpangunahan ni Presidente Ferdinand Marcos, Jr. kag mga nasyunal kag lokal nga opisyal sang gobyerno.
“Jalaur River project will enable the structure to respond to climate change benefitting many Filipinos. Its severe amount of irrigation will increase food production, bolster agricultural productivity, and provide substitute livelihood for Filipino farmers and communities,” mensahe ni Ambassador Lee.
Kun matapos ang proyekto kag ini ang mangin operational, magalapad ang irrigation service area sang National Irrigation Administration (NIA) sa 9,500 ka ektarya nga nagasakop sa “rain-fed agricultural lands” sa 17 ka mga banwa nagikan sa nahauna tubtob sa ikaapat nga distrito sang probinsya sang Iloilo.
Dugang pa, ang proyekto magapasanyog sa pagpatubas sang palay sa 71%, halin sa 197,000 pakadto sa 338,000 metric tons kada tuig para sa service area sang NIA sa probinsya.
Suno sa datos sang NIA sang Hunyo 2024, naglab-ot sa 75.51% ang kabug-usan nga pisikal accomplishment sang JRMP II nga may substantial completion sang tatlo ka dam sang Jalaur nga ginalakipan sang High Dam, Afterbay Dam, kag Alibunan Catch Dam.
Ginpahayag ni Ambassador Lee nga ang seguridad sa pagkaon kag pagkambyo sang klima ang nalakip sa prayoridad sang Korean Official Development Assistance (ODA) sa pungsod.
Napaidalom ang JRMP II sa ODA sang South Korea pinaagi sa Economic Development Cooperation Fund (EDCF) nga magapabakod sang relasyon sang duwa ka pungsod.
Naglab-ot sa P8.98 billion ang ginpondohan sang EDCF.
“May the Jalaur River Project become a shining endeavor of Korea-Philippine friendship especially when we mark the 75th anniversary of PH-Korea diplomatic relations,” suno kay Ambassador Lee. (AAL/LMLE/PIA)
