ILOILO CITY (PIA) — Ginapaabot ang mas mabaskog nga sektor sang agrikultura sa kabug-usan sang Western Visayas bangod sa Jalaur River Multi-Purpose Project Stage II (JRMP II) sa banwa sang Calinog.
Paagi sa tatlo ka dam kag line canals nga naga-abot 80 kilometros, ginhambal ni Presidente Ferdinand Marcos Jr. nga makabulig ang JRMP II sa pagpatigayon sang food sufficiency kag security sa rehiyon.
Sa iya nga speech sa inagurasyon sang JRMP II dams sang Hulyo 16, ginhatagan igtalupangod ni President Marcos ang bentaha sang proyekto, nga nagabalor P20 bilyones, sa kapin 25,000 ka mga mangunguma kag 4,500 ka mga pamilya.
Bangod sa tayuyon nga suplay sang tubig-irigasyon sa masobra 30,000 ka ektarya sang lupa nga gamit sa pagpanguma, ginapaabot sang Presidente ang pagtaas sang produksyon sang bugas sa 160,000 metriko tonelada ukon 20 porsyento sang tuigan nga kinahanglan sang Rehiyon 6.
Ginkalipay ni Ruben Carbo, presidente sang LAMGUICAN (Lampaya, Guiso, kag Canabjan) Irrigators Association, ang pagtukod sang JRMP II nga magahatag sang bastante nga suplay sang tubig sa mga mangunguma sa bilog nga tuig.
“Kami very excited sa proyekto nga ini kay kami rain-fed [farms] lang. Pero, sa tuod-tuod gali, bisan mainit, nami ang patubas kung may patubig,” hambal ni Carbo.
Dugang niya pa, makabulig ang proyekto indi lang sa ila mga miyembro kundi pati man sa bilog nga pungsod paagi sa ila mas dako nga kontribusyon sa produksyon sang bugas.
Samtang, ginpakigbahin ni Rena Caras, isa ka miyembro sang Jalawodnon Indigenous People (IP) sa banwa sang Calinog, nga may pagduha-duha sa ila komunidad antes gintukod ang proyekto pero sa ulihi, naintindihan ang katuyuan kag maayo nga intensyon sini.
Subong man, ginhambal ni Caras nga ila na nabatyagan ang mga benepisyo sang proyekto sa ila mga lupa nga gamit sa pagpanguma.
“Sang una, duro ang pagbinaisay antes ginpatindog ang dam kay basi maguba ang amon parangabuhian. Pero sa pagpaintindi sang NIA (National Irrigation Authority), amat-amat, nakahangop kami sang katuyuan sang sini nga proyekto. Dukaron, hanggod ang bulig na kanamon,” hambal ni Caras.
Dugang pa sa pagpasanyog sang sektor sang agrikultura, ginapaabot man ang pag-improbar sang ekonomiya sang rehiyon.
Hambal ni Presidente Marcos, sarang makahatag ang Jalaur high dam sang 86 milyones ka litro sang tubig kada adlaw para sa kinahanglan nga commercial kag industrial bulk water sang siyudad sang Iloilo kag nakapalibot nga kabanwahanan.
Dugang pa, ini nga proyekto, nga ginapangunahan sang NIA kag ginpondohan sang gobyerno sang South Korea, maka-ubra sang 6.6 megawatts nga hydroelectric power para dugangan ang suplay sang kuryente sa isla sang Panay.
Ang JRMP II may katuyuan man nga pasanyugon ang ecotourism, aquaculture development, watershed management, kag flood mitigation nga may pag-ulikid sa palibot kag mga komunidad nga sakop sang proyekto.
Bangod sa mga benepisyo nga dala sini, ginakabig ni Presidente Marcos ang JRMP II nga “Kabulig sa Kauswagan” sang mga pumuluyo sang Rehiyon 6. (AGP/BPS/PIA Iloilo)
