SYUDAD SANG ROXAS, Capiz (PIA) — Nagpatigayon sang programa ang lokal nga panguluhan sang probinsya kag Veterans Federation of the Philippines – Capiz Chapter kaangot sa ika-80 ka tuig nga pagsukat sang kahilwayan sang probinsya kag Veterans Memorial Day sang Disyembre 20 sa Provincial Park diri sa Roxas City.
“Isa ka sagrado nga paghanduraw, pag-respeto kag pagpasidungog sa pagkabaganihan kag sakripisyo sang Capiznon nga mga guerilla nga hangaway nga nagmadinalag-on batuk sa mga dumuluong nga pwersa sadtong Disyembre 20, 1944,” pahayag ni Veteran Col. Andres Ferrer nga presidente sang 2nd Capiz Veteran District.
Nahibaluan nga ang probinsya ang nahilway sa kapin duha ka tuig kag walo ka bulan nga pagsakop sang mga Hapones pinaagi sa kaisog kag pagkabaganihan sang mga Capiznon nga “freedom fighters.”
Matandaan nga nag-abot ang mga Japanese guerilla sa probinsya sang Abril 16, 1942 kag nagtukod sang ila kampo sa Roxas City kag iban pa nga kabanwahanan tubtob nga napukan ang pagsakop sang mga Hapones pinaagi sa pagpatigayon ang lokal nga mga rebolusyonaryo sang pag-atake sa mga kampo sang Hapones.
Sa iya nga bahin, ginhingyo ni Atty. Leobeth Deslate – Delicana nga Legal Officer sang probinsya nga nagakadapat nga matagaan sang pasidungog ang mga sakripisyo sang mga Capiznon nga hangaway pinaagi sa pagkabuhi sang ila pagkabaganihan.
Si Atty. Delicana ang nagtiglawas kay Gobernador Fredenil Castro sa nasambit nga programa.
“Napuno sang pagpasalamat kag bugal ang aton tagipusuon samtang ginadumdom naton ang mga baganihan nga nagpakig-away para sa kahilwayan sang Capiz nga aton gina-enjoy subong,” pahayag sang abogada.
Gindugang pa niya nga ang okasyon “indi lamang isa ka selebrasyon sang kahilwayan kundi isa man ini ka madalom nga pahanumdom sang ang mga sakripisyo nga ginhimo sang aton maisog nga mga gerilya nga Capiznon nga nagdedikar sang ila kabuhi para masiguro nga magkabuhi kita sa lugar nga hilway kag may dignidad.”
Ang tagsa ka Disyembre 20 ang nadeklara nga “Capiz Liberation Day” base sa hagna nga gin-aprobahan sang Sangguniang Panlalawigan sadtong 1994.(AGP/AAL/PIA Capiz)
