LUGAIT, Misamis Oriental (PIA) – Pinasikad sa Municipal Ordinance No. 7 nga gitawag ug “Sons and Daughters Award,” gipasidunggan sa Lugait local government unit (LGU) ang mga kalampusan sa mga lumulopyo niini, isip pagpasalamat sa gipakita nga tabang alang sa kalambo-an.
Pinaagi sa pagpahigayon sa tinuig nga seremonya kada sumad sa pagkahimugso sa lungsod, mao pud kini ang hinungdan nga gimugna ang pinaka prestihiyosong pagpasidungog sa mga kalampusan sa mga lungsuranon.
Pipila ka mga lumulopyo ang nahatagan sa maong awards. Sa public service dunay 15 ka lungsuranon ang gipasidunggan; blood donors-27; real property donors for public purpose-1; ug heroic acts-4.
Sa akademya, gipasidunggan usab ang mi-graduate ug board passers nga 28 kabuok; Civil Service Exam passers-2; masteral-10; graduate with latin honors (cum laude)-34 kabuok ang nahatagan sa medalya lakip ang P7,000 cash matag usa; magna cum laude, 14 ang gihatagan sa medal ug cash nga P15,000; summa cum laude-1 nga nakadawat og medalya ug P25,000 cash; graduates with degrees-93; graduates in diploma courses-4; merit award-3; ug sports excellence-12.
Naghatag usab og Special Awards ang Department of the Interior and Local Government kon DILG. Dunay duha ka barangay ang nakadawat sa Seal of Good Local Government (SGLG) samtang walo pud ka mga barangay ang nakadawat sa Lupon Tagapamayapa Incentives Award.
Ang chairperson sa Committee sa “Sons and Daughters Award,” nga si Vice Mayor Roger Lim mipaabot sa iyang pasalamat ug panghinaut ngadto sa mga naghatag sa mga Award
“Magmalampuson unta kita ug hatagan kita’g dugang kadasig diha sa pagkab-ot sa atong mga pangandoy,” matud sa vice mayor.
Samtang mipahalipay usab si Mayor Wellie Lim sa mga lumulopyo tungod sa ilang kakugi ug walay hunong nga paningakamot alang sa kalambo-an sa tanan.
“Masukli-an gyud ang dungog ug dugang kalambo-an nga gihatag ug gipakita sa mga honorees diha sa ilang tagsa-tagsa ka mga barangay diin sila nanginabuhi,” dugang sa mayor.
Ang speaker nga si Athena Gwyneth Colao, miingon “To those who thought nga ‘diskarte muna bago diploma,’ if you have the resources, unaha ug tiwas ang eskwela.”
Isip pagsaulog sa 64th foundation anniversary sa pagkahimo nga lungsod sa Lugait, ang “2025 Sons and Daughters Award” gipahigayon Marso 13, karong tuiga, sa Lugahait Sports Complex. (Lugait MCO/PIA Misamis Oriental)
