Subay sa pag-obserba ug pag-andam sa Leprosy Prevention and Control Week sa umalabot Pebrero 21 hangtod 27, ang mga kawani sa buhatan sa City Health ug Department of Health (DOH) nagkahiusa sa kampanya batok sa sakit nga leprosy o sanla sa Dapitan Aqua Marine Park ning syudad, kaniadtong Pebrero 16 tuig 2023.
Mipadayag sa iyang kalipay si Mayor Seth Frederick “Bullet” P. Jalosjos nga ang kahimtang sa leprosy sa Dapitan dili hulga sa publiko. Bisan pa, iyang gipahimangnoan ang tanan nga kinahanglan dili mokompyansa ug kinahanglan nga magpadayon sa pag-monitor sa mga kaso ug pagkaylap sa maong sakit tungod kay gawas sa pisikal nga deperensya, ang mga tawo nga apektado sa leprosy nag-atubang usab sa stigmatization ug diskriminasyon.
Mihatag ug lektyur si Joanri Riveral, Sr., consultant sa DOH ug gikan sa Culion Foundation, Inc., kabahin sa leprosy, pagpakaylap sa mga importanteng impormasyon, ug paghunong sa mga deskriminasyon kalabot na sa mga maong sakit.
Dugang pa ni Riveral nga ang leprosy kaniadto gikahadlokan tungod kay usa ka makatakod ug makadaot nga sakit, apan karon nasayranan na nga dili kini dali nga mokaylap ug mamahimong mamaayo kon kini gikonsulta gilayon sa doktor ilabina nga adunay epektibong tambal alang niini.
Ang leprosy usa ka sakit nga nakuha gikan sa bakterya nga mycobacterium leprae. Magsugod kini sa pagkausab sa kolor ug pagkamanhod sa panit lakip na ang pagkamanhod sa kamot, tiil ug sa nawong nga sa mata ug ilong, paghubag o adunay bukol sa nawong ug dalunggan, pagkasamad o paso sa mga kamot ug tiil nga wala nataptan.
Nagtuo ang usa ka lalaki nga taga Ilaya, 25 anyos, ang nakasinati sa mga sintomas nga allergy lang sa panit apan sa pagkonsulta niya sa doktor usa na diay kini nga leprosy.
Mipahimangno usab si Riveral ngadto sa mga residente nga kon makasinati sa mga sintomas magpakonsulta gilayon aron malikayan ang pagtakod niini.
Human sa maong lektyur mipahigayon sila ug screening ug contract tracing sa mga residente nga nakaangkon sa maong sakit. (Marecris Am-is, Photo by Mark G. Potot | Dapitan City Information Division)
