ILIGAN CITY (PIA) – Isip kabahin sa mga paningkamot sa pag-ayo ug pagpanalipod sa importansya sa coastal ecosystems, kapin 1,300 ka mangrove propagules ang natanom pinaagi sa usa ka mangrove planting event nga gipahigayon sa Marcelo Fertilizer, Barangay Maria Cristina.
Kini nga kalihokan usa ka advanced nga selebrasyon alang sa World Wetlands Day nga ipahigayon sa Pebrero 2, ubos sa tema nga, “Protect Wetlands for our Common Future.”
Gipangulohan kini sa Department of Environment and Natural Resources (DENR), pinaagi sa Community Environment and Natural Resources Office (CENRO) Iligan ug Provincial Environment and Natural Resources Office (PENRO) sa Lanao del Norte. Kapin 137 ka mga partisipante gikan sa 18 ka lain-laing pribadong kompanya, organisasyon, ahensya sa gobyerno, ug mga environmental advocates ang nitambong sa maong planting activity.
Tumong sa kalihokan mao ang pagtaas sa kahibalo sa publiko bahin sa kahimtang sa wetlands ug pag-ayo sa mga mangrove areas sa mga baybayong dagat sa Iligan City. Ang lokal nga kagamhanan sa Iligan adunay nursery sa lugar aron masiguro ang padayon nga supply sa propagules alang sa umaabot nga mga kalihokan.
Mapasalamaton si Saiben P. Mampao, officer-in-charge sa CENR Iligan Office, sa mga stakeholders sa ilang pag-apil sa kalihokan. Sumala niya, nagplano sila sa pag-establisar og usa ka sustainable nga partnership pinaagi sa usa ka memorandum of agreement uban sa mga stakeholder. Nanawagan sab siya sa katawhan nga maghiusa aron maghimo og proactive nga mga lakang alang sa pagpanalipod sa kinaiyahan.
“I’d like to encourage everyone that protecting the environment is a responsibility of everyone. We cannot do it alone. We are doing this not only for ourselves but also for future generations. This is a noble campaign, and as stewards, we must protect the environment,” sumala niya.
Samtang, sumala ni Arnulfo Osio, Provincial Environment and Natural Resources Officer sa Lanao del Norte, dako ang papel sa mga komunidad sa pagprotektar sa kinaiyahan.
“Dako kaayo ang role sa community kay kita nga mga stakeholders, NGAs, parte ra sa pagsuporta nila. Sila gyud ang mag-una, kini dapat usa ka community-led activity. We hope this will be sustained para mapadayon ang pag-protect sa kinaiyahan, dili lang sa wetland areas kundi sa kinatibuk-an gikan sa bukid padulong sa dagat,” matod niya.
Gibutyag sab niya ang plan nga iimplementar ang Project TRANSFORM, usa ka inisyatiba nga nagtinguha sa pagpalig-on sa mga local governance alang sa environmental protection ug natural resource management. Tumong sa proyekto nga tapukon ang mga ahensya sa gobyerno, pribadong institusyon, ug uban pang mga partners alang sa pagtimbayayongay alang sa kinaiyahan.
Plano nga ipatuman ang proyekto sa mosunod nga tulo ka tuig. Magsugod kini sa mga pilot projects sa mga lungsod sa Bacolod, Kauswagan, Nunungan, ug Munai, ug magpadayon ngadto sa Iligan City ug sa tibuok probinsya sa Lanao del Norte ug sa northern Mindanao.
Ang mga ahensya nga nipartisipar sa kalihokan mao ang Petron Iligan Terminal, Global Port, PMO Lanao del Norte, Iligan Cement Multipurpose Cooperative, Republic Cement Mindanao Inc., Community and Family Services International, Ecosystems Work For Essential Benefits, Philippine Coast Guard, ug ang Philippine Ports Authority-Project Management Office sa Lanao del Norte. (LELA/PIA-10/Lanao del Norte)
