NEGROS OCCIDENTAL (PIA) — Nakalab-ot na sa 1,791,000 sa 2,665,322 nga mga Negrosanon sa probinsya nga nakaparehistro sa National Identification System ang nakabaton na sang ila Plastic ID base sa rekord sang Philippine Statistics Authority.
Ginpahayag ni Aira De la Banda nga PhilSys Provincial Focal Person sang PSA nga base sa datus, masobra katunga na ini sang mga nagrehistro samtang nagapadayon sa gihapon sang kampanya ang PSA sa paghingyo sa mga pumuluyo nga magpalista sa national ID.
Iya gin klaro nga wala ginapilit ang isa ka indibidwal sa pagkuha sang ID apang ginahingyo sang gobyerno ang pag-angkon sini bangud isa na ini sa karon nga mayor nga ID nga ginapangita o gina-usar sa aton pungsod.
Sa nasyonal nga lebel, may 86,721,951 nga mga Pilipino ang nagparehistro sa national ID kag may 50,845,453 na ang nakabaton sang ila plastic ID.
Suno kay De la Banda, kon wala pa ang ila plastic ID pwede man nga makapa imprinta sila sang temporaryo nga ID nga yara sa papel paagi sa pagkadto sa talatapan sang PSA.
Nahibaluan nga may kabudlayan nga naagum ang bahin sa pagbaton ukon “acceptability” sang national ID sang umpisa bangud wala diri nakabutang ang pirma sang nagapanag-iya apang ginklaro ni Dela Banda nga ginhungud ini bangud pwede mapeke ang pirma kag sa bilog nga kalibutan amat amat naman nga ginadula ang pirma sa ID bangud sa nasambit na nga rason.
Dugang pa niya, nga sa mga may edad na nagalain naman ang agi sang ila pirma gani ang mga datus nga yara sa national ID supisyente na para makilala ang isa ka tawo.
Samtang padayon sa gihapon ang national ID registration sa SM City Bacolod kag Ayala Malls Capitol Central kag nagalibot man ang PSA sa mga barangay agud masikop tanan ang mga wala pa nakaregistro, suno kay De la Banda. (AAL/Lljr/ PIA6 Negros Occidental)
