SYUDAD SANG ILOILO (PIA) – Sa pagsaulog sang ika-123 nga Labor Day, ang Department of Labor and Employment (DOLE)-6 natalana nga mag-host sang isa ka grand job fair nga nagatanyag sang masobra 9,000 ka mga bakante nga trabaho sa lokal kag sa luwas sang pungsod. Ang kahiwatan hiwaton sa Mayo 1, 2025, sa Robinsons Place Iloilo, sugod alas 9:00 sang aga.
Sa ginpatigayon nga press conference sang Abril 24, 2025, ginpahayag ni DOLE-6 director Atty. Sixto Rodriguez Jr., nga ang job fair may ara sang 98 ka mga local employers kag lima ka mga overseas recruitment agencies, nga nagarepresentar sang mga industriya kaangay sang business process outsourcing (BPO), manufacturing, retail, food kag madamo pa.
“If you are planning to be a customer service representative, sales associate, service crew, bus conductor and driver, and food handler, these are the top list of our available vacancies. We are inviting everyone to pre-register,” siling ni Rodriguez.
Sugod sang Abril 24, kapin sa 1,500 ka mga aplikante ang naka-pre-register na agud makabenepisyo sang mga karera nga matigayon sa tion sang kahiwatan.
Para mangin mahapos ang pagkadto sang mga aplikante, magatanyag ang DOLE-6 sang libre nga transportasyon pinaagi sa Western Visayas Transport Cooperative nga magadul-ong sa mga nagapangita sang trabaho pakadto kag pabalik sa Robinsons Place Iloilo.
Isa ka One-Stop-Shop para sa mga serbisyo sang gobyerno ang igapahamtang man sa lugar. Ang mga nagapasakop nga ahensya amo ang SSS, PhilHealth, PAG-IBIG, TESDA, DOH, PSA, NBI kag madamo pa.
Magluwas sa job placement, ang DOLE-6 natalana man nga magsuporta sa pagpauswag sang palangabuhian kun sa diin 1,400 ka mga benepisyaryo sang DOLE Integrated Livelihood Program ang makabaton sang bulig sa nga nagalab-ot sa ₱34.5 million nga pondo.
May payout man ang DOLE-6 para sa 35,746 ka benepisyaryo sang emergency employment sa idalum sang Tulong Panghanapbuhay sa Ating Disadvantaged/Displaced (TUPAD) workers nga nagalab-ot sa PHP173 million. Ang tagsa ka benepisyaryo magabaton sang PHP513 nga minimum wage kada adlaw sa sulod sang 10 ka adlaw. (AAL/JNH/PIA Iloilo)
