SYUDAD SANG ILOILO (PIA) – Liwat nga nangin madinu-agon nga atraksyon para sa mga Ilonggo ang Kapitolyo sang Iloilo Provincial government matapos ini nga gindisenyuhan sang manami nga mga dekorasyon kag suga para sa pagsaulog sang paskwa kag bag-ong tuig.
Ara sa P4.8 miyones ang gin pain nga pondo sang Iloilo Provincial government para sa pagdisenyo sang kapitolyo kung sa diin ini ang pormal nga ginbuksan sang Disyembre 13, 2024 nga ginlakipan man sang isa ka fireworks display.
Ang tema sang programa subong nga tuig amu ang, “Christmas Village sa Makabagong Pilipinas,” kun sa diin lakip sa mga bag-o nga disenyo nga ginbutang amu ang lighted trains kag ferris wheel.
Magluwas sa madinu-agon nga mga atraksyon sa kapitolyo, nagdugang man sa kasadyahan ang manami nga performances sang mga empleyado sang kapitolyo kag ang food festivals.
Ginpahayag ni Iloilo Gov. Arthur Defensor Jr. nga tuigan nila nga ginapanami ang kapitolyo bangud gusto sini nga mangin kabahin ang kapitolyo sang mga Ilonggo sa pagsaulog sang paskwa.
Ginalauman man nga makapasanyog ini sang ekonomiya sang probinsya kag makahatag sang dugang nga kita para sa micro, small, medium enterprises (MSMEs) bangud sa madamo nga tao nga nagalagaw sa lugar. (AAL/JNH/PIA Iloilo)
