SYUDAD SANG ILOILO (PIA) – Nagpirma sang isa ka memorandum of agreement (MOA) ang Pag-IBIG Fund sa nagkalain-lain nga stakeholders sa probinsya sang Guimaras para sa pagparehistro sang ila mga impormal nga empleyado, kaangay sang mga yara sa job order kag contract-of-service, bilang miyembro sang ang Home Mutual Development Fund.
Isa ka kasugtanan ang ginpirmahan sang ahensya kaupod ang gobyerno probinsyal sang Guimaras, Local Government Unit of Jordan kag Nueva Valencia, Guimaras Specialist Medical Center, Inc. (GSMCI), kag Guimaras State University (GSU) sa ginhiwat nga ceremonial signing sadtong Oktubre 4, 2024 sa Brgy. San Miguel sa Jordan, Guimaras.
Ang kasugtanan nagatuyo sa pagtugot sa mga impormal nga empleyado nga maka-avail sang mga benepisyo kag serbisyo nga ginatanyag sang ahensya, pareho sang multipurpose loans, housing loans, kag iban pa.
Ang MOA ang ginpirmahan ni Pag-IBIG Fund chief executive officer Marilene C. Acosta, kaupod si Guimaras Governor JC Rahman Nava, Nueva Valencia Mayor Paul Vincent De La Cruz, GSMCI chief of hospital Dr. Tomas Saiton Jr., kag GSU administrator Dr. Lilian Diana Parreno.
Nagpabutyag naman sang pagpasalamat si Gov. Nava sa Pag-IBIG Fund para sa inisyatibo sini nga madala sa mga serbisyo kag benepisyo ang JOs kag CoS.
“We are really thankful for Pag-IBIG. We are thankful that not only the formal sectors can avail the Pag-IBIG benefits and packages, but as well making it available to a lot more of our informal employees. So, this is a big welcome from our personnel who belong to those groups,” siling ni Nava.
Ginpahayag naman ni Dr.Saiton nga makabenepisyo ang nasambit nga kasugtanan sa ila mga empleyado sa ospital, bangud sakop na sila subong sang serbisyo sang Pag-IBIG Fund, ilabi na sa tion sang emerhensya.
Samtang, ginpahayag ni Pag-IBIG Fund Molo Branch head Atty. Stahley F. Alayon nga ang kahiwatan isa ka testamento sang “genuine partnership” sa tunga sang ahensya kag sang stakeholders sini sa Guimaras sa paghatag sang mas maayo nga benepisyo kag serbisyo sa ila mga nasakupan.
“Making this agreement shows the care and concerns that our partners have for their employees, their needs, welfare and future,” Alayon stressed. (AAL/JNH/PIA Iloilo)
