Ginpangunahan ni CORE Philippines Inc. President kag Executive Director Norma Chan-Pongan ang pagpirma sa isa ka kasugtanan para sa pagpasanyog sa Breaking Barriers in the First 1,000 Days of the Child (BBF1KD) project kaupod ang mga banwa sang Maasin, Sta. Barbara kag New Lucena sa probinsya sang Iloilo. (PIA Region VI photo)
SYUDAD SANG ILOILO (PIA) – Isa ka Memorandum of Agreement (MOA) ang ginpirmahan sang CORE Philippines, Inc. kapupod ang LifeBank Microfinance Foundation kag tatlo ka mga banwa sa probinsya sang Iloilo para sa pagpasanyog sang nutrisyon para sa kabataan.
Ang ini nga kasugtanan ang timaan sang paglunsar sang ikaduha nga hugnat sang “Breaking Barriers in the First 1,000 Days of the Child (BBF1KD)” nga proyekto.
Sa mensahe ni Norma Chan-Pongan, Presidente kag Executive Director sang CORE Philippine Inc., ang BBF1KD project wala lang nagahatag sabat sa child stunting, kundi nagahatag sa mga kabataan sang tyansa nga mabuhi, magdaku kag malambot ang ila potensyal.
Si Chan-Pongan ang nagpirma sang kasugtanan sa bahin sa CORE Philippines, apang ang tatlo ka mga alkalde ang nagpirma diri sa ngalan sang ila tagsa ka banwa. Si Mayor Francis A. Amboy para sa banwa sang Maasin, Mayor Dennis S. Superficial sang Sta. Barbara, kag Mayor Liecel M. Seville sang New Lucena.
Ining tatlo-ka-tuig nga partnership nagatuyo nga matapna ang child stunting kag malnutrisyon, labi nga ginahatagan importansya ang kritikal nga tion sa una nga 1,000 ka adlaw sa kabuhi sang isa ka bata gikan sa pagpanamkon tubtob malambot sini ang duha ka tuig nga edad.
Sandig sa pagtuon, ang kabataan nga makabaton sang husto nga nutrisyon sa sulod sang ini nga tion sang ila kabuhi ginalauman nga labing makatibawas sa mga masakit, makumpleto ang ila pagtuon, makapangita sang trabaho, kag makaagum maayo nga pamilya.
Angay nga magatutok ang kasugtanan sa pagpadayon sang BBF1KD project nga anay naumpisahan sa banwa sang Maasin kag sa sini nga ikaduha nga hugnat, igapalapadon sa kabug-osan nga 26 ka kabarangayan sang tatlo ka mga banwa.
Ini ginabug-os sang 17 ka mga barangay sa Maasin lakip na diri ang nauna nga duha ka mga pilot barangay, tatlo sa banwa sang Sta. Barbara kag anom sa New Lucena.
Kabahin sang kasugtanan ang mga tikang nga nakasentro sa nutrisyon kag nagasuporta sa kapasidad sang mga LGU para sa pagpatuman sang F1KD nga mga programa sa ila banwa. Ginasuportahan man sini ang Philippine Plan of Action for Nutrition (PPAN) 2023-2028 sa bulig sang National Nutrition Council (NNC).
Suno sa NNC, ang isyu sang child stunting isa ka panghangkat para sa rehiyon nga nagaapekto indi lang sa ikaayong-lawas sang isa ka bata kundi sa iya man nga buwas-damlag.
Bilang pasalamat, naghatag sang ila bug-os nga suporta ang tatlo ka mga alkalde sa ini nga kasugtanan nga tingub sa kawsa sa pag-amlig sang nutrisyon kag kabuhi sang kabataan nga Ilonggo. (AAL/FRG/PIA6)
