SYUDAD SANG ILOILO (PIA) — Ginpangunahan sang Commission on Elections (COMELEC) ang ginpatigayon nga Solidarity Pact Signing para sa palaabuton nga piniliay kaupod ang nagkalain-lain nga ahensya sang gobyerno kag mga sektoral nga grupo.
Ginpahayag sang Police Regional Office (PRO) 6, sa isa ka press release, nga ang in inga lihok nagatuyo nga mas mapabaskog ang paghiliugyon sang mga ahensya sang gobyerno kag mga organisasyon sa rehiyo agod nga mapasangkad ang kalinongan kag maamligan ang integridad sang demokrasya para sa Mayo 12 nga piniliay, lakip man sang labing una Bangsamoro Autonomous Region in Muslim Mindanao (BARMM) Parliamentary Election.
Sa iya mensahe, ginpahayag ni Regional Election Director Dennis L. Ausan sang COMELEC 6 nga ang ila tingob nga pagpirma sa kasugtanan nagapakita sang paghugpong para masiguro ang madinalag-on nga eleksyon.
Ginhatagan man importansya ni Ausan ang papel sang paghiliusa sang tagsa ka mga organisasyon sang pampubliko kag pribado nga sektor agod ila bug-os man nga mapreparahan kag matibawas ang mga panghangkat nga palaabuton.
Sa bahin sang kapulisan, bilang tiglawas ni Police Brigadier General Jack L. Wanky, ginpakigbahin ni Deputy Regional Director for Administration Police Colonel Alexander G. Mariano sang PRO 6 ang ginaambit nga katungdanan sang kapulisan sa pag-agom sang nasiling nga katuyoan.
Nagtambong man sa aktibidad si Regional Director Juan Jovian E. Ingeniero sang Department of the Interior and Local Government (DILG) kon sa diin iya ginhatagan sang mas dako nga importansya ang pagpasangkad sang kalinongan, pagsakdag sang pagsulundan sang mga kasuguan, kag pagpasanyog sang paghiusa sa pag-amlig sang sadsaran nga kinamatarong sa pagboto sang katawhan.
Lakip man sa nagtambong sanday Coard Guard District Western Visayas commander Commodore Philipps Y. Soria, 301st Infantry Brigade commander Colonel Nhel Richard Patricio nga nagrepresentar kay 3rd Infantry Division acting commander Brigadier General Michael G. Samson, Department of Education (DepEd) 6 Chief Administrative Officer lawyer Jessica S. Sapalo sa baylo kay Regional Director Dr. Ramir B. Uytico, kag Engr. Roy D Zabala of Department of Information and Community Technology (DICT) sa ngalan ni Regional Director Ralph Joseph C. Moncatar.
Sa bahin sang mga sektoral nga grupo, presente sa aktibad sanday Reverend Monsignor Meliton B. Oso, direktor sang Jaro Archdiocesan Social Action Center kag tiglawas sang Parish Pastoral Council for Responsible Voting (PPCRV), Iloilo Baptist Church director Pastor Richard Lee Martin Sr. kag Uztadz Samsuddin M. Domin, isa ka manugwali sang Islam. (AAL/FRG/PIA6/lakipan sang report kag mga laragway gikan sa PRO 6)
