SYUDAD SANG ILOILO (PIA) – Isa ka Memorandum of Understanding (MOU) ang ginpirmahan sang West Visayas State University (WVSU) kag sang Philippine Information Agency (PIA) Regional Office sa Western Visayas sang Abril 25 sa WVSU Main Campus, La Paz, Iloilo City.
Ini nga kolaborasyon naghatag sang importansya sa tingob nga kasugtanan sang duha ka institusyon sa pagsuporta kag pagpatuman sang nagapanguna nga mga programa sang gobyerno nga nakasentro sa edukasyon kag pagpanalawsaw, sustainable nga panghimanwa, pampubliko nga impormasyon, kag development communication.
Suno kay Cheryl B. Amor, regional head sang PIA-6, nagapadayon ang PIA sa pag-adbokar sang importansya sang development communication sa pagtanyag sang paghimo sang desisyon nasanto sa ihibalo, kasinawan, partisipasyon-sibiko kag pagbag-o sang pamatasan.
Si Amor ang ang nagpirma sa MOU sa ngalan sang PIA-6, apang si University President Dr. Joselito F. Villaruz sa bahin sang WVSU.
Sa iya mensahe, ginpakigbahin ni Villaruz nga pamatuod ang ini nga kolaborasyon para sa kasugtanan sa paghatag sang labing maayo para sa mga bumulutho kag iban pa nga mga stakeholder sang unibersdad.
Sa idalom sang ini nga kasugtanan, suno kay Edel Carmela Subong-Csoka, nagapamuno sa International and Local Linkages Office (ILLO) sang WVSU, ang PIA kag ang WVSU magapatuman sang mga tingub nga mga proyeto, information drive, workshop kag mga hinun-anon nga nagatuyo nga mapataas ang ihibalo sa mga polisa sang gobyerno, sustainable nga mga buhat, kag responsibilidad nga sibiko.
Dugang, magaserbe ang ini nga inisyatibo bilang plataporma para sa mga bumulutho kag manunudlo nga magpartisipar sa pampubliko nga diskurso kag makapakigbahin sa paghinun-anon sa polisa.
Sa pagpormalisar sang ini nga kasugtanan, positibo si Amor nga mapabaskog ang kolaborasyon sa tunga sang duha ka mga institusyon agod nga maagom ang isa ka “Matatag, Maginhawa, at Panatag na Buhay para sa Bawat Pilipino sa Bagong Pilipinas,” ilabi na sa mga pamatan-on nga nagabug-os sang 18.3 porsyento sang kabilogan nga populasyon sang rehiyon.
Ginsaksihan nanday WVSU ILLO director Subong-Csoka, Professor Lara Jeunesse Villaruel, faculty member sang College of Communication, kag Assistant Regional Head Easter Anne D. Doza sang PIA-6. (AAL/FRG/PIA6)
