NABUNTURAN, Davao de Oro (PIA) — Gideklarar ni Presidente Ferdinand R. Marcos Jr. ang katapusang adlaw sa trabaho sa Nobyembre isip “National Bike-To-Work Day” isip kabahin sa mga paningkamot sa gobyerno sa pagpataas sa kahibalo sa publiko bahin sa posibilidad sa pagbisikleta isip usa ka paagi sa transportasyon ug pagpalambo sa aktibong transportasyon sa Pilipinas.
Ang duha ka pahina nga Proclamation No. 409 nga gipirmahan ni Executive Secretary Lucas Bersamin niadtong Nobyembre 28 nagpasiugda sa panginahanglan sa pagpataas sa kahibalo sa publiko bahin sa pagbisikleta isip usa sa mga mag-unang pamaagi sa transportasyon aron sa dugang pagpalambo sa cycling infrastructure sa Pilipinas.
Tumong usab sa proklamasyon nga ipasiugda ang balanse ug pagpahimsog sa ekolohiya subay sa ritmo ug panag-uyon sa kinaiyahan, pagsiguro sa balanse tali sa kalamboan ug pagpanalipod sa kinaiyahan, ug pagmentinar sa kalidad sa hangin nga nanalipod sa kahimsog ug kaayohan sa tawo.
“The Philippine Development Plan 2023-2028 underscores the need to develop active transport network, and accord highest priority to pedestrians and cyclists in the hierarchy of road users,” gipahayag sa Proklamasyon.
“The post-pandemic ‘New Normal’ requires the adoption of measures to enable safe, independent, physically-distanced travel, especially for essential
workers, so that the country is better prepared in the event of another health emergency,” dugang kini.
Gitahasan ni Presidente Marcos ang Inter-Agency Technical Working Group on Active Transport (IATWG-AT) sa Department of Health (DOH) aron mangulo, ug maglantaw sa pagtuman sa “National Bike-to-Work Day.”
Ang Presidente mimando usab sa IATWG-AT sa pag-ila sa mga programa, proyekto ug mga kalihokan alang sa tinuig nga selebrasyon samtang iyang giawhag ang publiko ug pribadong sektor sa pagsuporta sa tinuig nga “National Bike-to-Work Day.” (PND/Transalated by JSD)
