ILIGAN CITY (PIA) — Gibida ang klase-klaseng bag-ong mga produkto ug teknolohiya sa Northern Mindanao Regional Innovation Program and Exhibit (NorMinRIPE) 2025, nga nagtumong sa pagpalig-on sa kalamboan sa ekonomiya sa rehiyon.
Gibida sa nagkadaiyang ahensya sa gobyerno, mga unibersidad, mga startup, ug pribadong sektor ang ilang mga produkto, programa ug serbisyo alang sa mas maayong kaugmaon.
Usa sa mga gibida ang coconut tree climbing robot, dynamic gripper robot and robotic arm cutter nga gihimo sa pito ka estudyante sa Computer Engineering sa St. Peter’s College, Iligan City. Kini nga robot makahimo og automatic nga pagkatkat, pag-ani, ug paghiwa sa lubi, usa ka luwas ug episyenteng alternatibo sa delikado nga tradisyonal nga paagi sa pag-ani.
“Nagkagamay ang maharvest, kana ang problem and naka-think mi, why not mag-create mi og product nga mo-harvest. Safe pod ni, pananglitan mukatkat ta in-kaso lang di man malikayan nga usahay danlog. Isa pod sa delikado ana while gakatkat sila, ang sanggot naa ra sa kilid gibutang,” matod ni Zuri Manogura, usa sa mga miyembro sa team,
Gawas sa robotics, gipakita usab sa NorMinRIPE ang mga inobasyon sa agrikultura ug aquaculture nga gipasiugdahan sa Regional Agri-Aqua Innovation System Enhancement Program sa Department of Science and Technology – Philippine Council for Agriculture, Forestry, and Natural Resources Research and Development ug mga kauban nga institusyon.
Sumala ni Sheila Poonon, program leader sa Agri-Aqua Tech Component 3, dako kaayo ang panginahanglan sa innovation aron mapalig-on ang agri-aqua sector ug masiguro ang pagkaon sa katawhan.
“Kinahanglan gyud ang innovations nato kay ang agri-aqua sector, it needs attention gyud. We need to innovate for food security. Kung di nato ma-help ang sector through entrepreneurial activity, di gyud siya pwede mag-grow ang businesses in the sector,” sumala niya.
Ang uban pang mga ahensya ug eskwelahan nga nibida sa exhibit mao ang National Economic and Development Authority-10, Department of Information and Communications Technology-10, Philippine Veterans Investment Development Corporation Industrial Authority Misamis Oriental, Local Government Unit sa Iligan, University of Science and Technology of Southern Philippines-Cagayan de Oro, Mindanao State University–Iligan Institute of Technology, ug Central Mindanao University. (LELA/PIA-10/Lanao del Norte)
